مابيعجبنيش غناكي وماتعديش الحدود.. القصة الكاملة لأزمة شيرين عبد الوهاب وبهاء الدين محمد
أثارت المطربة شيرين عبد الوهاب، أزمة بينها وبين الشاعر بهاء الدين محمد، بعد سؤالها عن أكثر أغنية ندمت على تقديمها، والتي أجابت بأنها: ماتجرحنيش.
وعلق الشاعر بهاء الدين محمد على هذا التصريح قائلًا، عبر حسابه الرسمي بـ فيس بوك: مش متعود أرد على أي حد.. ولكن لما حد يتجاوز حدوده لازم يقف مكانه، ويعرف إنه مهما اتعود يغلط لازم ييجى عند بعض الأسماء ويحاسب ويخلى باله، وخاصة لما حد في كل كارثة يدافع عنها.. وهتكلم باختصار جدا.
وتابع بهاء الدين محمد: المشهد الأول، أول يوم دخلت شيرين عبد الوهاب مكتبي كانت مع الأستاذنصر محروس، اللي هو صاحب الفضل في تقديمها، وبعد دقائق من اللقاء لقينا شيرين بتبكي وسألها نصر بتعيطي ليه ردت علشان أنا قاعدة مع الأستاذ بهاء.
بهاء الدين محمد يهاجم شيرين عبد الوهاب
وأضاف: والمشهد الثاني رشحتها تغني كتير بنعشق، ولولا موافقة نصر احتراما للعشرة اللي بنا ماكانتش هتغنيها، لأنها كانت موقوفه من النقابة.
واستكمل: المشهد الثالث لما فوجئت بمدير أعمالها الراجل اللي أنا بحبه وبحترمه، لقيته بيكلمنى نيابة عنها ويقولي سمعني الجديد، وده طبعا خطأ لأن اللى بيغني مهما كان اسمه مش المفروض يغلط غلطة زي دي، لأن المشهد ده مش لايق على المشهد الأول.. المشهد الرابع والأخيرأغنية ماتجرحنيش أنا لحد الآن مش عاجبني غُنا شيرين مع احترامي الكامل لصوتها، وأكيد لولا الأستاذ نصر ماكانش هيتم اللقاء.. وماتجرحنيش من أهم أعمالي ومن حقي أدافع عنها نتاج تهور اللي غنيتها.
واختتم: وكمان لأول مره ألاقي حد بيحارب نَفسه وبيغلط في مبدعين اشتركوا في صناعته.. وعشان أكتب الكلام ده يبقى شيرين غلطانه كالعادة، بس كان لازم أقولها ما تعمليش كده تاني وأنتي بتكبري بس مش هتعدي حدود حجم بعض الأسماء ولا أعمالهم.
تامر حسين يعُلق على الأزمة
من جانبه علق الشاعر الغنائي تامر حسين على تلك الأزمة قائلًا: أستاذنا وكبيرنا عبقري العباقرة هو احنا عندنا كام بهاء الدين محمد؟.. تاريخ عظيم واستمرارية لحد يومنا وأنا الحقيقة معرفش ده رد شيرين بنفسها، ولا حد من إدارة السوشيال ميديا، ويمكن خانها التعبير أو ما تقصدش العمل الفني، لأنها أغنية قيمة كلام ولحن وتوزيع وخاطرك كبير عندنا كلنا، أستاذنا ولا تزعل نفسك، أكيد شيرين مايرضيهاش يوصلك الإحساس ده، يا تاريخ ياحبيبي، وأغانيك العظيمة لو كتبتهالك في بوست مش هنخلص.
