حلمي بكر يهاجم نجل حميد الشاعري: هقدم بلاغ ضدك للنائب العام
علق الموسيقار حلمي بكر، على هجوم نديم نجل الفنان حميد الشاعري، بسبب انتقاد الأول الدائم لوالده في البرامج التليفزيونية.
وقال الموسيقار حلمي بكر في تصريح خاص لـ القاهرة 24، إن حميد الشاعري الحالي غير الذي قدم الموسيقى قديما، وأصبح يتحدث عن حياته الشخصية أكثر من المزيكا.
واستكمل حلمي بكر، أنه ليس من الاحترام أن ينتقد نجل الفنان حميد الشاعري شخصًية مثله، ويستهزأ به، قائلًا: حميد الشاعري كان بيقدم فن دلوقتي بقى بيتكلم كتير، وأنا بتكلم عنه كويس دايما، وابنه ليه بينتقدني المفروض يورث منه فن مش ألفاظ، كل واحد يشوف حجمه، وطالما أبوه معاه فلوس أوي كده يتبرع بيها للغلابة.
وأضاف حلمي بكر، أنه من الممكن أن يتقدم ببلاغ للنائب العام ضد نجل حميد الشاعري، يتهمه فيه بالسب والقذف.
نجل حميد الشاعري يهاجم حلمي بكر
وهاجم نديم الشاعري نجل الفنان حميد الشاعري، الملحن حلمي بكر؛ بسبب هجوم الآخر على والده في البرامج التلفزيونية.
وكتب نجل حميد الشاعري عبر حسابه الشخصي بموقع التواصل الاجتماعي فيسبوك: أستاذ حلمي لو محتاج مساعدة ماديا أو نفسيا الكابو مش حيتأخر عليك لكن ما ينفعش كل ما تتزنق تروح برنامج تجيب سيرة حميد الشاعري.. اللي للأسف تاريخك ميجيش تمن تاريخه ولا فنيا ولا أخلاقيا للأسف 30 سنة من عمري ما بيعملش حاجة في حياته غير التقليل من الناس، ومن الفنانين ومن أعمالهم.
واستكمل نجل حميد الشاعري: أوعى حضرتك تفتكر إنك محطوط في خانة الإنسان المحنك، لا للأسف أنت عبرة لكل نفسية فاسدة متناهية الصلاحية فنيا وأخلاقيا، فرق التربية كبير أوي بينك وبين الكابو حتى في الفكر الموسيقي والمعاملة مع الناس، والكابو كبير مقامه ومش بيرد عليك عشان هو أكبر من كده وأكبر منك بالذات ودايما بيقولي ما تردش على حد، لكن ولاده كبرو ومش حيسمحوا إنك تقطع في أبوهم.
وهاجم نديم الشاعري الموسيقار حلمي بكر، وقال: هو حضرتك بجد فاكر إن حميد هو اللي بوظ المزيكا في مصر؟!؟!؟، المقسوم اللي حضرتك بتتكلم عليه هو الواكل بقاله 30 سنة مع كل الفنانين وهو سر الاستمرارية والنجاح، مفيش ألبوم بينزل غير ومقسوم الكابو رانن في الودن، لما مذيع صابغ شعره أبيض وفي اللفة يسألك سؤال زي ده، والمفروض ردك يبقى تربوي قبل الفني أنه إزاي يسأل السؤال بالطريقة دي لكن حضرتك كنت هتطير من الفرحة عشان السؤال في تقليل للكابو.
واختتم نجل حميد الشاعري حديثه، قائلا: حاول يا أستاذ حلمي تكسب الناس عشان الدنيا فانية، متبقاش خسران السيرة الطيبة وكمان الناس.
