صديق قاتل شيماء جمال: القاضي انهار وقالي إنه متجوز واحدة عرفي وبتهدده بالفضيحة في الشغل والبيت | تحقيقات
أدلى حسين الغرابلي، المتهم الثاني في واقعة مقتل الإعلامية شيماء جمال، وصديق القاضي أيمن حجاج، المتهم الأول بقتل زوجته المذيعة، باعترافات تفصيلية حول الواقعة، وملابساتها وظروفها، وكيف تم الخطيط لها وتنفيذها، وكيف حاول إخفاء الجريمة، والأسباب التي دفعته للاعتراف بالجريمة.
اعترافات شريك قاتل شيماء جمال
وقال المتهم حسين محمد إبراهيم الغرابلي، أمام جهات التحقيق في استجوابه حول إشراكه بمقتل الإعلامية شيماء جمال: أنا عندي 49 سنة، وأنا عايز أقول إني أعرف المستشار أيمن عبد الفتاح من حوالي 20 سنة، لأنه كان بيتاجر في العربيات وأنا كنت بودیله العربيات للمعارض، وكنت باخد حسنتي وبعد كده أنا سافرت الإمارات سنة ورجعت فتحت مكتب عقارات، وهو كان بيتاجر في الشقق والعقارات، وكنت ساعات بشتغل معاه، أبيع له شقة أو أشطب له عمارة وبعدين أنا اشتغلت في المقاولات، وكنت برضه بشتغل معاه وعلاقتنا اتقطعت مع بعض من سنة 2010 حتى سنة 2019، وعرفت أن ابنه توفي في حادثة ورحت عزيته، وكنا بنتصل نسلم على بعض بس مكنش في شغل بينا، لحد من سنة أنا كلمته لأني كنت عاوزه يدخل معايا في حتة أرض، وعرضت عليه يأخذ شقة لكن هو مرضيش، بس أنا كلمته بعدها بشهرين وساعتها وافق، وعملنا عقد واداني 80 ألف جنيه مقدم، وكان باقي مبلغ 20 ألف جنيه.
إعادة العلاقة بعد انقطاعها لمدة 9 سنوات
وأضاف المتهم الثاني بقتل الإعلامية شيماء جمال: كمان أنا كنت بتصل بيه كتير عشان يديني باقي الفلوس، بس هو كان مش بيرد عليا، وكان بيقولي أنا مشغول أنا مش معايا فلوس، لحد من حوالي شهر ونص فاتوا رد عليا وحسيت إنه بدأ يجر معايا ناعم، وبعدين قالي تعالي نتقابل في كافيه، ورحت قعدت معاه وساعتها قالي بقولك إيه شوفلنا مزرعة حلوة كده نتأجرها، فقولتله ليه، فقالي عشان لو معايا مصلحة نقعد قعدة حلوة فقلتله ماشي، وبدأت أدور على المزرعة فعلًا، وفي ظرف يومين عرفت أجيب مزرعة كويسة في البدرشين، وقلتله عليها وكان إيجارها 8 آلاف جنيه في الشهر.
كيف بدأت فكرة مزرعة البدرشين؟
واستكمل صديق أيمن حجاج المتهم بقتل المذيعة شماء جمال: القاضي كان مسافر الغردقة لأنه شغال في الغردقة، ولما رجع قعدت معاه وبعد كده رحنا شفنا المزرعة، وعجبته وقالي تمام وكمل باقي التشطيب وكلمنا الراجل صاحب المزرعة، اسمه الحاج عامر، علشان يبعتلنا العقود عشان نمضيها، وبالفعل جت العقود مع ابن الحاج عامر، وجالنا عند المزرعة والمستشار أيمن مضى نسختين من العقد، وابن صاحب المزرعة خد نسخة والمستشار أيمن خد نسخة وادهاني قالي خليها معاك ومشينا، وقالي قابلني على قهوة في المهندسين بالليل.
لماذا فكر القاضي أيمن حجاج في قتل شيماء جمال؟
وأردف صديق المتهم الأول حديثه بـ: لما اتقابلنا بالليل قالي أنا متجوز واحدة عرفي وعملالي مشاكل جامدة، وعاوزة مني 3 مليون جنيه، عشان أطلقها بدون مشاكل، ولما أنا قلتله ليه المبلغ ده كله قالي دي ست استغلالية، وأنا مش عاوز شوشرة فأنا قلتله الحكاية مش مستاهلة، الرجالة كلها متجوزة عرفي، فانهار وقالي هي بتهددني وعاوزة تروح الشغل وتفضحني، وعاوزة تروح تقول لمراتي، وأنا عاوز أوهمها إن المزرعة اللي احنا أجرناها اشتريتها وهكتبها باسمها؛ عشان أخلص منها وأطلقها وأنا سألته هنعمل كده إزاي قالي ملكش دعوة هي بتثق فيا، وأنا هقولها إني خلصت مصلحة لواحد وهو إداني المزرعة دي وهكتبها باسمك، بس أنت وضب وجهز المزرعة بحيث هي لما تشوفها تتشد ليها وتقول أنها مزرعة لقطة وحلوة، والباقي عليا، واداني شيكين بالفعل باسم محمد ابني، واحد بمبلغ 50 ألف جنيه والتاني بمبلغ 20 ألف جنيه.
