راعوا ربنا.. محمد التاجي يوجه رسالة قاسية لـ الساخرين من مصطلح السينما النظيفة
وجه الفنان محمد التاجي، رسالة إلى الساخرين من مصطلح السينما النظيفة، بحجة الإبداع الفني، مشيرًا إلى أنه رفض المشاركة في فيلم عمارة يعقوبيان بسبب أن دوره كان يحتوي على مشهد ساخن.
وقال محمد التاجي لـ القاهرة 24: رفضت مشهد طلال صاحب محل ملابس اللي اشتغلت عنده هند صبري لأن كان فيه مشهد ساخن، لأن لازم الواحد يراعي ربنا وولاده والمجتمع اللي هو فيه.
وأضاف: أحيانًا كان يرمز لهذه المشاهد بأي شيء آخر، كخبطة شباك عوضًا عنها حتى يفهم دلالتها، لكن النهاردة بحجة الفن والثقافة والإبداع الفني نظهر كل ما هو في غرف النوم وكأننا دخلنا تحت طائلة أفلام البورنو.
ندمت على مشهد في فيلم ديل السمكة
وتابع: للأسف غلطت مرة واحدة في فيلم ديل السمكة من تأليف وحيد حامد، وما كنتش أعرف أن المشهد هيتنفذ بالشكل ده، فاضطريت أقدمه لكن لو أعرف قبل التصوير كنت رفضت، وما كررتش الموضوع وربنا سترها معايا والرقابة شالت منه ومارضيش ليا أني أكون بالإباحية دي.
وواصل: مرة مخرج طلب مني أقدم دور قبلة مع الفنانة الراحلة ليلى فهمي لأننا كنا بنقدم دور اتنين متجوزين، لكني رفضت وقلت لهم لو هي حتى وافقت أنا مش موافق، لأن كمان جوزها كان صديقي.
واستكمل: بقول للي بيتريقوا على السينما النظيفة اعملوا اللي أنتم عاوزينه، لكن ليه ألاقي واحدة بتقول اللي مش عاجبه يعتزل، مش أنتي اللي هتخليني أعتزل أنا براعي ربنا، لكن أنتي مش بتراعي حتى المجتمع، وإحنا القوة اللي هتقف في وش الانحلال باسم سينما الإبداع الفني.
