نادية شكري بطلة العيال كبرت: عاوزيني أروح مكاتب الكاستينج كأنني لسه ببتدي.. والتمثيل بقى شلل
كشفت الفنانة نادية شكري، بطلة مسرحية العيال كبرت سبب ابتعادها عن الوسط الفني في الآونة الأخيرة، كما تحدثت عن رأيها بالأعمال التي تعرض حاليًا.
وقالت نادية شكري لـ القاهرة 24: الجيل بتاعي بيعاني؛ لأننا تعودنا على طريقة معينة في التمثيل ومبقتش موجودة ودلوقتي بيطلبوا مني أعمل تجارب أداء، وأروح مكاتب كاستنج وكأني ببدأ من الصفر، ودا لأني سافرت 7 سنين برا مصر وبعدت فترة كبيرة، زمان المخرج كان بييجي يشوف الممثل بنفسه ودا مبقاش موجود.. وأنا مقدرش أتنازل عن كرامتي.
نادية شكري: معتزلتش بس التمثيل بقى شلل
وواصلت نادية شكري: أنا معتزلتش أبدًا ولكن التمثيل بقى بنظام الشلل والعلاقات، وبالتالي نفس الممثلين هما اللي بيظهروا في جميع الأعمال، والنقابة مش قادرة تحل الأزمة دي وتشغل الناس اللي قاعدين في بيوتهم لأن المنتجين مش بيسمعوا.. وأنا بطلت أظهر في لقاءات تليفزيونية لأني حسيت أن نفس الكلام بيتعاد، وكنت بظهر بهدف المشاركة، ولكن حسيت أن ده بلا هدف وقولت أقعد في البيت أفضل وبقيت أسيبها على ربنا.
ومن ناحية أخرى، اشتهرت نادية شكري بـ شخصية سحر في المسرحية الشهيرة العيال كبرت، والتي ضمت عددا كبيرا من الفنانين، أبرزهم سعيد صالح، يونس شلبي، حسن مصطفى، وكريمة مختار، وغيرهم من الفنانين، بالإضافة إلى مشاركتها في مسلسل السبع وصايا بـ دور فتحية بالتعاون مع العديد من الفنانين، من بينهم رانيا يوسف، وهيثم أحمد زكي، وهنا شيحة.
