ناس تخاف ما تختشيش.. سليمان عيد بعد التنمر عليه من جماهير الأهلي: مسامحهم ومش هقاضيهم
تحدث الفنان سليمان عيد عن حملة الهجوم التي تعرض لها من سب وإهانة، بسبب الصورة التي نشرها احتفالًا بفوز نادي الزمالك بلقب الدوري المصري للمرة الـ14 في تاريخه، معلقًا عليها: لقد استيقظ الشخص اللي فريقه أخد الدوري مرتين على التوالي، مشيرًا إلى أنه تراجع عن مقاضاة المسيئين له ووصفه بـ البواب.
وقال سليمان عيد لـ القاهرة 24: كان لعب عيال والموضوع انتهى، وأنا مسامحهم ومش هرفع قضية، لأني في الأول كنت زعلان جدًا، لكن قلت طالما قد ولادي خلاص، وإن شاء الله ما تتكررش تاني وتكون روحنا الرياضية حلوة.
المسؤولين عن الرياضة مش بيعملوا قوانين مغلظة للجماهير اللي بتشتم في المدرجات
وأضاف: هحتفل عادي بعد كده أنا ما جبتش سيرة حد وبتكلم على فرقتي وبتكلم بنية صافية، الهجوم ده سببه جهل، لأن في جزء من الألترس موجه ومعلمينهم أن قلة الأدب رجولة، والمسؤولين عن الرياضة مش بيعملوا قوانين مغلظة للجماهير اللي بتشتم في المدرجات ومفيش رقابة وكل واحد بيقول اللي عاوزه حسب تربيته.
عمر ما حد وجه لي شتيمة
وتابع: عمري ما حد وجه لي شتيمة خالص بالعكس النجوم بيقولوا لي إحنا بنشتم وأنت لأ، علشان كده اتفاجئت وما عملتش حاجة استاهل عليها الشتيمة، وده سببه تعصب وجهل وقلة تربية، وأطالب المسؤولين بتغليظ العقوبات لأن في ناس تخاف ما تخشيش، وأنا من النوع اللي بتعصب في الأول وبنسى وبقول مش مستاهلة وعيال صغيرين، ويا رب يتعدلوا واللي غلط مسامحه لو مش هيغلط تاني.
ومن ناحية أخرى، أكد سليمان عيد أنه يتمنى تقديم رسالة من وراء الأعمال التي يقدمها، مشيرًا إلى أنه يحب تقديم جميع الأدوار ولا ينحصر في الكوميدي فقط، مضيفًا: بحب أقدم كل الأدوار وأخدت جايزة على مشهد في مسلسل جزيرة غمام.
ولفت سليمان عيد إلى أن الكوميدي أصعب من التراجيدي، لأن التراجيدي يتطلب معايشة الحالة فقط، أما الكوميدي يحتاج لتفكير في كل شيء، مضيفًا: الافيه يكون جديد لأن كل جيل بيكون له لغة.
