صفية العمري: مبقاش لينا وجود عند المنتجين.. ليه قاهرينا كده؟
أعربت الفنانة صفية العمري، عن استيائها الشديد من تجاهل المنتجين والمخرجين لها، مشيرة إلى إنها ما زال لديها طموح وتريد تقديم العديد من الأدوار.
ووجهت صفية العمري، رسالة للمنتجين خلال حوارها التليفزيوني قائلة: أنا معرفش معظم المنتجين دلوقتي ويمكن هما مبقوش يعرفوني خلاص، وما زال عندي عطاء ولسه بقدر أشتغل، وعندي طموح ولكن قاهرنا ليه؟
يعني فيه حاجات بحلم إني أعملها في شخصيات وأدوار، المرأة المصرية ليها وجود هايل، ليه ميكتبوش لنجاح المرأة المصرية؟
وتابعت: مبقاش عندي أمل، لأن مش دول المنتجين بتوع زمان اللي بيعرفوا يختاروا الفنان المناسب للشخصية، أنا مش عايزة أظلم حد، ولكن إحنا مبقيناش مهمين بالنسبة لهم وملناش وجود.
كما صرحت صفية العمري، إنها تُعاني من الوحدة بسبب تواجد أبنائها في الولايات المتحدة الأمريكية، وقلة عملها خلال الفترة الحالية قائلة: أنا بعاني من الوحدة، وولادي ربنا يخليهم ليا بحاول قدر الإمكان إني أسافر عندهم في أمريكا، لكن فيه وحدة طبعًا والشغل كان بيلهيني.
صفية العمري
وطالبت الفنانة صفية العمري، بحصول الفنانين على مقابل مادي، نظير عرض أعمالهم على القنوات التلفزيونية، قائلة: إحنا الفنانيين اللي أعمالنا بتتذاع كل يوم المفروض يبقى لينا عائد والحقوق بتاعتنا ناخدها لكن محدش مهتم، العالم كله بيدفع للفنان، المنتجين مش هتدفع من جيوبها، لكن القنوات هي اللي مستفيدة لكن الفنان مش مستفيد بحاجة، للأسف النهاردة فيه فنانين كتير مرضى، هل ينفع إن الدولة هي اللي تعالج الفنان؟ أنا غضبانة جدًا.
