سبب عدم إقبالها على الزواج بعد طلاقها وسر جمالها.. أبرز تصريحات فريدة سيف النصر مع القاهرة 24
تصدرت الفنانة فريدة سيف النصر محركات البحث على جوجل بعد تغيير لون شعرها الأسود، وظهورها بلوك جديد، إذ شاركت جمهورها صورًا لها قبل المرحلة النهائية من صبغة الشعر وبعد اللوك الأخير.
وعبرت فريدة سيف النصر في تصريحات لـ القاهرة 24 عن سعادتها بالتعليقات من جمهورها، بعد ظهورها باللوك الجديد، قائلة: سعدت جدًا بتعليقات الجمهور وكل الكلام حلو فوق الوصف.
بمشي مع جمهوري في كل خطواتي
وأشارت إلى أنها نشرت الصور قبل المرحلة النهائية وبعدها: بمشي مع جمهوري في كل خطواتي، وفي ناس كتير أعجبوا باللون وسألوني عن مكان الكوافير.
شكلي حلو لأن جوايا نضيف
وكشفت فريدة سيف النصر كيفية الحفاظ على شكلها دون عمليات تجميل قائلة: بقول للناس اللي بيقولوا أن شكلي حلو ومش كبيرة، الموضوع كله في إن جوايا نضيف ومش بحقد على حد، وبقول سني الحقيقي ودوغري، وبقول للناس أن حبكم ليا مخليني حلوة في عيونكم، وإنكم بتحبوني لأن ربنا رامي محبتي في قلوبكم، وأنا طبيعية مع الناس لأن كله بيروح وفي التراب، وإحنا مجرد أشباح لكن ما حدش فاهم حاجة وده بيزعلني.
رفضت أتجوز بعد طلاقي
وتطرقت فريدة سيف النصر للكشف عن سبب عدم زواجها رغم طلاقها منذ أكثر من 30 عامًا، مشيرة إلى أنه تقدم للزواج منها الكثير لكنها رفضت لأنها كانت ترى أنه لا يصح أن تتزوج ولديها ابن.
وأوضحت في تصريحاتها مع القاهرة 24: أتقدم لي ناس كتير بعد طلاقي لكني رفضت، لأني كان معايا ابني صغير، لو اتجوزت كان لما يكبر هيتكسر لما يلاقي حد غير أبوه معايا، وإحنا صعايدة، وفي نفس الوقت ما أقدرش أسيب ابني مع حد غريب، إيه اللي يعرفني الراجل يطلع إيه ممكن يعلم ابني المخدرات أو يطلع شاذ.
ما يصحش أجيب راجل غريب ومعايا ابن
واستكملت: ما يصحش أجيب راجل غريب ومعايا ابن، واللي عملته مش تضحية ده واجب.. أمال النبي قال ليه أمك ثم أمك ثم أمك، واللي يخفلوا لازم يستحملوا، أومال بتخلفوا ليه ما تخلفوش أحسن، لكن مش كل الناس تفكيرها زي التاني، وكل واحد حر، وأنا بقول ابني فوق أي شيء، وبعد كده بنعجز والشغل بيروح وكل حاجة بتروح ومش هيفضل غير ابني.
وأردفت: مش شايفة أني ضحيت أو أني ما عشتش حياتي لأن ابني هو حياتي إيه التضحية في كده، وامتنعت عن شغل كتير وسفريات عشان خاطر ابني، ولما كنت بسافر كان بيكون معايا هو ووالدتي اللي كنت خدامة تحت رجليها، والحمد لله جوزت ابني وجاب لي بينتين بربيهم معاه.
