ناهد رشدي: جوزي قعد جنبي سنتين خلال مرضي.. وفي ناس كانوا عاوزين يخربوا بيتي
تحدثت الفنانة ناهد رشدي عن حب زوجها لها ومساندته لها خلال فترة مرضها، مشيرة إلى أنه ترك كل شيء ومكث بجوارها في المنزل لمدة عامين.
وقالت ناهد رشدي خلال لقاء في برنامج الستات المذاع عبر قناة النهار: جوزي قعد جنبي في البيت سنتين خلال فترة مرضي، ومن الناحية المادية بذل طاقة رهيبة، وتأكدت أن اللي وفي لأمه وبيراعي أمه واللي مامته فوق كل حاجة تحطيه في عنيكي لأنه زي ما خايف على مامته وقاعد في الشقة اللي جنبها، ومش عاوز يروح في مكان تاني هيعمل معايا كده، وتفاجأت باللي عمله معايا لأنه كان بيحب الخروج والسفر.
وأضافت: في ناس كانوا عاوزين بيتي يتخرب وبيحقدوا عليا، ويقولوا جوزها لما عيت قعد جنبها لأن جوزي قعد جنبي سنتين وماكانش بيخرج وكنت بتحايل عليه يشوف صحابه أو يسافر لكنه رفض.
ورفضت ناهد رشدي الإفصاح عن طبيعة المرض الذي تعاني منه، موجهة نصيحة لمن يعاني من أي مرض صعب أن يتعامل معه على أنه ضغط أو سكر مضيفة: أكتر فترة صعبة عدت عليا فترة المرض، وقعدت فترة طويلة في البيت والحمد لله دلوقتي قالوا لي انزلي واشتغلي.
وعن تفاصيل معانتها مع المرض قالت: شفت حاجات ما كنتش شايفها كل واحد بان على حقيقته، وبيبان مين فرحان فيك وأقرب الناس ليكي فرحانين ويقولوا أحسن أنك اتهديتي، وعارفة مين عشان كده مش بكتب أني تعبانة عشان لو حد بيحبني هيزعل بجد ومش عاوزة أزعله ولو حد بيكرهني هيشمت فيا.
واستكملت باكية: حاجة تزعل إنك 30 سنة مضحوك عليكي وقرايب بيضحكوا عليكي وأنت مصدقاهم، ودي تعتبر خيانة من ناس عاوزين يشوفوني في أسوأ حالة وفرحانين، وبيبان على الصوت ويشمتوا فيا، والإحساس اللي وصلني من الناس كان مؤلم أكتر من المرض نفسه، و5 بس هما اللي صحابي بجد منهم 3 من الوسط الفني وهما حنان سليمان وعزة لبيب ومي عبد النبي.
