محمد رمضان: أعمالي هادفة وأغانيا كلها طاقة إيجابية تمنعك من الانتحار
أكد الفنان محمد رمضان، أن الأغاني التي يقدمها لجمهوره مليئة بالطاقة الإيجابية والأمل، الأمر الذي قد يمنع الشباب من الانتحار.
وقال محمد رمضان في لايف عبر حسابه بموقع انستجرام: الأغاني بتاعتي كلها طاقة إيجابية بتخلي الناس ما تنتحرش، واللي بيمنعك تسمع الأغاني بتاعتي عايزك تنتحر، لأن كلها طاقة، كان نفسي أسمع وأنا في بدايتي أغاني زي بتاعتي، وعمري ما قلت لفظ خارج وأعمالي هادفة، عبده موتة في الآخر اتعدم.
لا أستفز جمهوري
كما أكد محمد رمضان في فيديو آخر أنه لا يستفز جمهوره بأغانيه، مشيرًا إلى أنه يتحدث في أغانيه بلسان حال جمهوره، مضيفًا: عمري ما استفزيت جمهوري، ولكن الأغاني اللي بقولها والكلام اللي في الأغاني بتكلم فيه بلسان حال جمهوري ومش بوجه الكلام لجمهوري، أكيد مش هقول لجمهوري مالك واقف خايف، وتعالى هنا لأني في الأول بقول له واقف في ضهري.
وتابع: يا ريت ما نساعدش على أي فتنة بين فنان وجمهوره اللي صنعه وأنا بنيت علاقة قائمة على الصدق، ولما بشتري حاجة بقول وبقول ربنا كرمني وأجري بقى كذا ودي حاجة تحترم، ومش بكذب ممكن أدعي الفقر وأنا بشتري بيوت لكن العلاقة بيني وبين وجمهوري زي النسب، أي كدب يبوظها ويفسدها.
واستكمل محمد رمضان حديثه قائلًا: ومش عاوزين نسمح لحد يوقع بينا ويصنع فتن، والحملة اللي طلعت وطالبت بإلغاء حفلي في الإسكندرية فاجأتني وأول ما طلعت قلت حملة ممولة وممنهجة زي اللي قلبها، وحاجات كتير من يوم ما طلعت ومش برد، لكن إسكندرية بالذات تختلف لأن بدايتي في إسكندرية لو أي محافظة ممكن أشك.
