عفاف شعيب: لازم المحجبة تهتم بنفسها.. لبسي كله مستورد ولما بفتح الدولاب بقول يا رب اختارلي
تحدثت الفنانة عفاف شعيب عن سر اهتمامها بمظهرها، وكيفية اختيار ملابسها كمحجبة، مشيرة إلى أنها أصبحت تعاني بعد توقف استيراد الملابس إذ كانت تعتمد على شراء جميع ملابسها من الخارج.
وقالت عفاف شعيب في لقاء تلفزيوني: مش كل الموديلات بتناسبنا كمحجبات ومظلومين، وأنا لأني كنت بسافر كتير فلبسي كله من بره، دلوقتي مفيش استيراد وبقيت في حوسة، وفي محل كنت بتعامل معاه من زمان وكنت باخد منه لبس بالهبل وكل البدل المستوردة من ألمانيا.
وأضافت: لازم المحجبة تهتم بلبسها وتكون منظمة ما حدش يقول ايه الحجاب ده، لأني بشوف ناس بيعملوا حاجات غريبة، لازم اللبس يكون منسق.. أنا لما بلبس دهبي لازم ألبس لها دهب مش ألماظات كل حاجة لازم ألبس لها الشيء اللي يناسب، ولو لابسة بدلة أو بادي دهبي ما ينفعش البس عليه حاجة بيضة، وببذل مجهود كبير ولما بفتح الدولاب بقلب الدنيا وأقول يا رب اختار لي بذات لما أكون طالعة في البرامج لو في التمثيل باخد الدولاب كله معايا.
وتابعت عفاف شعيب: الحمد لله ربنا مدينا نعم وبيحب نعمه تظهر على البني آدم علشان كده بمتع نفسي وألبس واتشيك.
من ناحية أخرى، تحدثت الفنانة عفاف شُعيب، عن بداياتها الفنية مشيرة إلى أن بداياتها الحقيقية كانت من مسلسل قيس وليلى، الذي أشاد الفنان محمود المليجي بموهبتها في التمثيل من خلاله.
واستكملت في تصريحات تلفزيونية: في بداية حياتي الفنية جيت أعمل دور لبنى في مسلسل قيس ولبنى، الأول كنت مرشحة لـ دور ثالث، ولما لقوا إني كويسة إدوني دور تاني، وجت زوزو نبيل رحمة الله عليها، ومحمود المليجي الله يرحمه، قال لهم معاكم صاروخ ورايحين تدوروا على لبنى؟ ما معاكم لبنى أهي.
