رامي جمال: عرضت أغنية اوعديني على حماقي وتامر حسني ورفضوها.. وبقت من أهم أعمالي
كشف الفنان رامي جمال، كواليس تحضيراته لأغنية اوعديني، الذي رفض تقديمها كل من الفنان محمد حماقي، وتامر حسني.
حماقي قالي سيبني أفكر وتامر مقالش حلوة ولا وحشة
وقال رامي جمال، خلال لقائه في برنامج سهرانين، الذي يقدمه الفنان أمير كرارة، والمذاع عبر شاشة قناة ON: أغنية اوعديني بعد ما عملتها رحت لـ محمد حماقي وسمعها وقالي حلوة جدًا وسيبني أفكر فيها، قُلت له براحتك لأن مش معنى إننا أصدقاء يبقى لازم تغنيها، ده مش المثل اللي بتّبعه في الشغل، وبعد شوية قالي لأ يا رامي مش حاسس الأغنية وحاسس إني سمعتها قبل كده، فثقتي في الأغنية مقلتش.
وأضاف رامي جمال، أنه اتخذ قرار بتسجيل الأغنية بعد رفض تامر حسني وحماقي، تقديمها، قائلًا: بعت الأغنية لـ تامر حسني، في نفس الوقت، لإن كده مفيش التزام بيني وبين محمد حماقي، ودول الصوتين اللي كنت مصدق إنهم ينفع يغنوها، وتامر مقالش هي حلوة ولا وحشة، وفكرة عدم ثقتهم في الأغنية مش معناها إنها هتخليني أحبها أكتر أو تقلل ثقتي، بالعكس، أنا أول ما تامر ماردش خدت القرار إني هدخل أسجلها تاني يوم، والحمد لله هي من أهم الأغاني في طريقي، أنا لا أُحبط.
أغنية أوعديني
قدم الفنان رامي جمال، أغنية اوعديني، عام 2016، وحققت نجاحا كبيرا منذ طرحها عبر قناته الرسمية بموقع يوتيوب، حيث تخطت الـ 61 مليون مشاهدة.
