عمرو يسري: بتألم لما حد يتصور معايا ويقولي إنت فين؟.. والمجال معتمد على الشللية
تحدث الفنان عمرو يسري، عن سبب ابتعاده عن الوسط الفني، مؤكدًا أنه لم يقصر بشيء، ولكن الأمر أصبح معتمدا على الشللية بالوسط الفني على حد قوله.
وقال عمرو يسري، في تصريحات تليفزيونية: بتألم لما بلاقي الناس في الشارع يتصوروا معايا ويقولوا إنت فين؟ دي بتقتلني، النقطة إن فيه تغيرات، والطفرة اللي حصلت كانت بعد 2011، الـ 10 سنين اللي فاتوا دول غيروا حاجات كتير، يعني نجوم كتير أوي بقوا في الظل، ومخرجين كتير نصهم رحمة الله عليهم أمثال حسين عمارة ورائد جديد، والنص التاني مبيشتغلش، وأصبح الموضوع في الجيل ده إنهم لازم يضربوا بالنار ويموتوا.
زمان المخرج كان نمبر وان دلوقت رقم 4
وأضاف يسري: ومش تقصير مني، والمسألة أصبحت شللية بحتة من الدرجة الأولى، وكل كرو بقى ليه الناس والمجموعة الخاصة بيه، سواء من منتج ومدير إنتاج ومخرج ونجم، وزمان المخرج كان بيبقى نمبر وان، ومن بعده الآخرين، دلوقتي المخرج بقى رقم 4، وتبقى طفرة لو المخرج حط اسم في العمل.
وأضاف عمرو يسري، إنه ما زال لديه الشغف لتحقيق حلمه بالتمثيل، قائلًا: على مدار سنيني دي كلها أنا معملتش حاجة، أنا لسة عندي شغف وعندي الطموح إن أعمل حاجة، يمكن فروق السن بتعلى ولكن بيقولولي إنت بيبي فيس ومبتكبرش، قُلت مش مشكلة المهم إني أرضي غروري الفني، لأن الفن في دمي، وعندي غيرة فنية وغيرة صحية، بس بيحصل مشاكل في الحياة تخلي الواحد ميكملش منها حريق بيتي ووالدي توفى فيها.
