حميد الشاعري يكشف سبب أزمة نجله نديم مع حلمي بكر
كشف الفنان حميد الشاعري سبب خلاف نجله نديم مع الموسيقار حلمي بكر، مشيرا إلى أن اختلاف الأجيال وراء الأزمة بالكامل، بجانب الحديث عن طريقته في تربية نجله.
وقال حميد الشاعري في تصريحات تليفزيونية: أنا كنت في عزل طبي لمدة أسبوع بسبب كورونا، ولقيت فيه حوار فجأة وأنا بحب حلمي بكر جدا، وعملنا الحلم العربي مع بعض، وكانت ظاهرة مش هتتكرر تاني، ومش عارف إيه اللي حصل، وقلت لنديم يمسح المنشور وحاولت أفهمه إن حلمي طبعه كدا من زمان واتعودنا عليه.
مش عارف حلمي بكر بيهاجمني ليه
وواصل الشاعري: لكن المرة دي أنا مش عارف حلمي ليه بيهاجمني؟ ولكن ممكن يكون السبب هو اختلاف الأجيال ما بينه وبين نديم ابني، ومع ذلك مفيش بيننا أي مشاكل أو أزمات نهائيا، هو صديق مقرب وأكلنا وشربنا مع بعض ودخل بيتي.
وأضاف حميد الشاعري: أنا عمري ما توسطت لـ نديم ابني عشان يشتغل مع عمرو دياب في أغنية ملاك الحسن؛ لأنه متربي على إيد عمرو دياب من صغره، بخلاف إنه عنده رأيه وحياته ومش بتدخل فيها، وأنا ربيت ولادي من صغرهم على الاستقلالية من سن 14 سنة، ونديم مستقل وله قراراته الخاصة من ساعتها.
خلاف نجل حميد الشاعري وحلمي بكر
بدأ خلاف نجل حميد الشاعري وحلمي بكر، بعدما انتقد حلمي بكر أسلوب والده في الغناء بأحد البرامج التليفزيونية، وقال بكر إن حميد الشاعري ليس لديه فكرة عن الموسيقى، وهو من امتحنه في نقابة المهن الموسيقي،ة وحصل على عضوية انتساب بدعم من النقيب ليس أكثر، وخرج نديم، نجل حميد الشاعري عن صمته ورد على حلمي بكر، عبر حسابه على فيسبوك، قائلا: لو محتاج مساعدة ماديا أو نفسيا الكابو مش هيتأخر عليك بس مينفعش كل ما تتزنق تطلع تتكلم عن حميد الشاعري اللي للأسف تاريخك ميجبش تمن تاريخه، وأنت للأسف 30 سنة من عمرك مش بتعمل حاجة غير التقليل من الناس والفنانين وأعمالهم.
