شيرين عبد الوهاب: صالحت عمرو دياب لأني بحترمه.. ومحدش يعاتبني على كلام قولته في حفلة خاصة
كشفت الفنانة شيرين عبد الوهاب سبب مبادرتها بالصلح مع المطرب عمرو دياب، مؤكدة أنها لم تقصد أي إساءة، بجانب الحديث عن علاقتها بالفنانة سميرة سعيد.
وقالت شيرين عبد الوهاب خلال لقائها في برنامج صاحبة السعادة مع الإعلامية إسعاد يونس: أنا صالحت عمرو دياب لأني مقصدش أي إساءة، ومينفعش حد يعاتبني على كلام قولته في حفلة خاصة وكنت بهزر، وأنا بحترمه وبحترم الجيل دا بالكامل، واتربيت على صوتهم وصوت إيهاب توفيق واتعلمت منهم الغناء، وأنا رجعت لـ صحابي بنفسية حلوة.
وأضافت شيرين عبد الوهاب: سميرة سعيد هي قدوتي، واتعلمت منها كتير هي ونوال الزغبي لأنهم ستات بيحبوا الحياة، ونوال الزغبي كانت بتبعتلي وتشجعني أرجع أغني، ولكني مكنتش بعرف أرد عليها أقول لها إيه.
ومن ناحية أخرى، سبق وتطرقت شيرين عبد الوهاب للحديث عن حفلها بـ ختام مهرجان قرطاج في تونس، قائلة: أنا كنت تعبانة صحيًا ونفسيا ومكنتش قادرة أقف على رجلي وجسمي كان مخزن مياه وكنت بعرق على المسرح لأول مرة، والمنظمين كانوا حاطين ليا 4 كراسي على المسرح عشان لو وقعت أي لحظة.. والحمدلله ربنا منحني القدرة إني أغني ولحد دلوقتي مش مصدقة أنا إزاي قدرت أحيي الحفلة.
وعلقت شيرين عبد الوهاب على ظهورها مع ابنتها في مقطع فيديو على تيك توك وهي تغني أغنية محصلش حاجة لسميرة سعيد، قائلة: بنتي بتستغلني وقالت لي في مرة إنها عايزة تزود المشاهدات على تيك توك، ووافقت أعمل معاها الفيديو.
