محمود الليثي بعد مشاركته في انتخابات الموسيقيين: ربنا يولي الأصلح
حرص الفنان محمود الليثي، على المشاركة في انتخابات نقابة المهن الموسيقية، التي تقام حاليا بنادي نقابة الممثلين بشارع البحر الأعظم في الجيزة، وعدد آخر من أعضاء الجمعية العمومية، ويتنافس على مقعد نقيب الموسيقيين 4 مرشحين، مصطفى حلمي، مصطفى كامل، علاء سلامة، شريف حمدي.
وقال محمود الليثي لـ القاهرة 24، ربنا يولي الأصلح وإحنا دايما في ظهره ولكن من يتولى النقابة بتمنى إنه ياخد باله من الموسيقى، الانتخابات دي كلها نزيهه بوجود أستاذ مصطفى كامل والمايسترو مصطفى حلمي، هل حد من الحضور شاف واحد في الانتخابات قاله إدي صوتك لفلان مثلا.
انتخابات نقابة المهن الموسيقية
كما تطرق محمود الليثي، للحديث عن مطربي المهرجانات، وأخص بالذكر حمو بيكا، قائلا: حمو دمه خفيف وعنده قبول 99%، وربنا كرمه في حتته المهرجان.. وقدر إنه ينجح فيها أنت بقا عندك عقبة في إيه.
وتابع محمود الليثي: ده المهرجانات كسرت الدنيا دي راحت الرياض يا جماعة اتكلموا كلام عقل، أنا عملت مهرجانات هل أنا قدمته وحش قدمت كلام خارج أنا مقدم أكتر من 1500 غنوة، دخلوا بيوت العالم كلها حققوا 4 مليارات مشاهدة، مطرب عربي في جمهورية مصر العربية يعني مصري وليا الشرف أن العالم كله سمع الأغاني اللي قدمتها.. مدارس الرقص كلها كانت بترقص على الأغاني بتاعتي.
وأضاف محمود الليثي قائلا: أنا بتكلم على مبدأ أنت لازم تكون مسئول، مدام ربنا منحك أن الناس تحبك لازم تبقى مسئول قدام العالم كله على اللي هيدخل البيوت.. لأن ده ممكن يبني مجتمع وممكن يهد مجتمع.
تصريحات مصطفى حلمي
وفي وقت سابق، كشف المايسترو مصطفى حلمي، برنامجه الانتخابي، عن أنه حال فوزه في انتخابات نقابة المهن الموسيقية، يسعى لخدمة أعضاء النقابة ورفع سقف العلاج لكي يتناسب مع ارتفاع الأسعار حاليا.
وسبق، وتحدث مصطفى حلمي عن برنامجه الانتخابي في تصريحات لـ القاهرة 24، قائلا: إنه يراهن حاليا على الجمعية العمومية أن اختيار النقيب لابد أن يكون لديه خطه وبرنامج منظم لخدمة الأعضاء، معلقا: لازم النقي يكون عنده خطة وبرنامج منظم يمشي عليه الأعضاء ويكون سر للعمل النقابي بشكل مختلف وأكاديمي، إن شاء الله كل حاجة تكون مدروسة.
وعن أسباب ترشيحه لانتخابات نقابة المهن الموسيقية، قال مصطفى حلمي: اتحمست للمشاركة؛ بسبب أن الحمد لله النقابة دخلها بقى كويس، ونقدر من خلال الموارد دي نعمل طفره للأعضاء ويكون في تنظيم هيحصل، وأيضا موضوع المعاشات إحنا عاملين دراسة جدول وآليات لارتفاع المعاش والمنظومة العلاجية لأننا عايزين نرفع سقف العلاج اللي يتناسب مع ارتفاع الأسعار.
