بعد اتهامه بالنصب.. المنتج سلطان الشن يرد على مسلم: خلافاته مش معايا وكذاب
علق المنتج السعودي سلطان الشن على اتهام مطرب المهرجانات الشعبية مسلم له بالنصب، وذلك بعدما زعم الأخير أن سلطان يأخذ نسبة أكبر من الأرباح.
وقال سلطان الشن لـ القاهرة 24: مفيش خلافات بيني وبين مسلم بسبب الأرباح، وهو لو قال إني نصبت عليه يبقى كذاب لأن مشكلته أساسًا مش معايا ولكن مع ناس تانيين دون ذكر أسماء، وأنا لحد دلوقتي مرفعتش عليه قضية ولكني حذرت فقط من التعامل معه وطرح أي أغانٍ له.
وسبق وكتب الشن عبر حسابه بموقع إنستجرام: أي شغل هينزل لأي حد من الفريق تبعي وبالأخص مسلم هيتم قفله في نفس اللحظة على يوتيوب أو أي منصة أخرى وهيكون فيه رد قانوني، ومسلم بيمر بفترة صعبة وإن شاء الله كل شيء هيكون كويس وهيرجع لكم.
اعتزال مسلم
ومن ناحية أخرى، أعلن مسلم اعتزاله منذ عدة أيام عبر حسابه بموقع إنستجرام، مشيرا إلى أنه لا يشعر بالحرية وهناك شخص ما يتحكم به.
وقال مسلم في تصريحات سابقة لـ القاهرة 24: اعتزالي الفن مش قرار بسيط ولكن أنا تعبت نفسيا ومش عارف أشتغل وأنا شايف حد بياكل حقي، والمنتج سلطان الشن بينصب عليا.
وواصل مسلم: الشن بياخد نسبة كبيرة من الأرباح، والمشكلة إن العقد اللي ما بيننا 8 سنين وبقول لـ نفسي أكمل ليه وأنا مش مستفيد وحد تاني بياخد مجهودي وفلوسي وأنا مخدتش من المجال غير وجع القلب وهرجع لما أكون حر.
