علي الحجار: ثلاثي أضواء المسرح اخترعوا الراب قبل الأمريكان.. وأرفض الغش في المهرجانات
عبّر الفنان علي الحجار عن رأيه في المهرجانات الشعبية، وأغاني الراب، مشيرًا إلى أن فرقة ثلاثي أضواء المسرح اخترعوا الراب قبل الأمريكان في فترة الستينيات.
وقال علي الحجار خلال استضافته ببرنامج It's Showtime على شاشة قناة cbc: أنا مش ضد أي لون غنائي ومن وأنا عندي 19 سنة بسمع غربي وياباني وكوري وهندي وكنت بدخل الفيلم أخرج حافظ أغنيتين.. كل أنواع الموسيقى أنا مش ضدها، والراب الأمريكاني كان له مفردات كنت بتخض منها في الأول لأنه كان فيه كلام قبيح، الفن مش كده، انتم بتبوظوا ذوق الناس، الناس اللي بتعجب باللي بتقولوه هياخدوه نموذج يحتذوا بيه وكلام دارج جدًا.
وأضاف: لما رفضت الحكاية دي في الراب الأمريكي.. افتكرت إننا عندنا راب قبل الأمريكان في الستينيات ويبقى مشهور في السبعينيات ثلاثي أضواء المسرح، كانوا بيقدموا الغنا التوقيعي، بيغنوا كلام مش لحن طويل وطبلة معاهم، وبعدين طوروه، اخترعوا الطريقة دي في الغناء يحكي عن حالة معينة وفيه قافية ووزن مفيهوش إباحية ولا حاجة تجزع لما نسمعها ولا حاجة توطي الذوق العام أو سُبة في حق الفن نفسه، يمكن أنا قديم، وشايف إن الفن حاجة أقيم، بحب الراب من أحمد مكي واللي اتعمل في مسلسل بـ 100 وش، وطلاما مفيهوش حاجة لا تجرح المستمع أو يحتذي بالكلام الوحش.
وتابع علي الحجار: المهرجانات أنا محتار فيها شوية؛ لأن الراب له صورة، المهرجانات مجرد مهندس الصوت هو اللي بيغنيله وبيظبطله صوته والنشاز ويحطه على الاوتوتيون، متضحكش عليا وعلى الجمهور وتعمل عليا إنك بتغني ويطلع على المسارح ويقدم حفلات وفي الآخر يغني بلاي باك؛ لأنه لو غنى بجد هيتفضح فضيحة الإبل.
وأردف علي الحجار: مش رافض المهرجانات وروحت أفراح الفترة اللي فاتت وشوفت العريس والعروسة وأهلهم بيرقصوا عليها وحافظينها صم، في الأول اتخضيت من المهرجانات دي وكانت دوشة بالنسبة لي؛ لأني مش سامع لحن ولا كلمات مفيدة فاتبسط وأقول الله معنى حلو، بقيت بسمعهم وعارف خلاص إن ده الاوتوتيون اللي بقى بيغني، الغش اللي برفضه جمب الكلمات اللي بتتغنى، لو الكلمات مفيهاش حاجة اباحية ولا حاجة خارجة وتجرح، أنا موافق جدًا.
