شيرين عن تصريح الغارمات لـ القاهرة 24: أنا فقيرة ولكن بفكر بعقلي ولازم نربي أولادنا على القناعة
ردت الفنانة شيرين على تصريحها السابق بشأن ممانعتها التبرع للغارمات، مشيرة إلى أن أزمة الغارمات أبعد من حلها بالتبرع للغارمات.
وأوضحت شرين لـ القاهرة 24: قلت إننا مش لازم نتبرع للغارمات وما تكلمتش في الموضوع باستفاضة لأن ما كانش فيه وقت، ودكتور نيفين قالت لي إحنا بندرس كل حالة قبل لما نسدد لها لكن المشكلة أبعد من كده، لأن الناس عندها موروث بيقول إني لازم أجهز بنتي بـ 24 بطانية و24 ملاية، وحاجات فوق الخيال وأنا بقول إن ده كتير على أي أب أو أي أم، في الوقت الحالي أو قبل كده.
أنا ست فقيرة:
وأضافت: أنا ضد أي ست أو راجل تتحبس والفقر عمره ما كان عيب أنا ست فقيرة أساسا بس أنا بفكر بعقلي ولازم الواحد يكون عنده قناعة ويعلم ولاده يكون عندهم قناعة.
وتابعت شيرين: اتكلمت مع أكتر من حالة ستات وجالة وفي واحد لسه هيجوز بنته، قلت له ممكن تجيب لها 4 أو 5 ملايات هي مش هتغير ملابة كل يوم، شاشة واحدة في الريسبشن كفاية مش لازم في أوض النوم قال لي طيب والناس تقول إيه قلت له إنت بتعمل علشان الناس، إذ كان على الناس جيب كراتين فاضية ومشيها على عربية قال لي يعني أضحك على الناس، قلت له عندي فكرة روح أدي مفاتيح عربيتك لصاحب العربية وروح على أي بنك أو على أي سوبر ماركت وأسرقه واتسجن ما أنت كده كده هتتسجن.
واستكملت: اتكلمت مع واحدة متخرجة ومعاها ليسانس حقوق وبتعمل ماجستر مش عايشة هنا، قالت لي لازم نجيب 12 بطانية قلت لها هي العروسة بتتكسح مش بيكون لها إيد تغسل في الغسالة، قلت لها يا بنتي لازم اللي زيك يغيروا فكر الناس لأننه مش بالتعليم لأن الموضوع مش هزار والموضوع أصبح كبير على كل المستويات فلازم يكون فيه حل.
وجاءت تصريحات شيرين بشأن التبرع للغارمات خلال حضورها ندوة وزيرة التضامن الاجتماعي دكتورة نيڤين القباج، وذلك خلال فعاليات مهرجان الإسكندرية السينمائي لدول البحر المتوسط في دورته الـ 38 التي أقيمت مؤخرًا.
وقالت شيرين: اسمحوا لي أقول إني ضد التبرع للغارمات، وعارفه إني هتهاجم على الكلام ده، لكن دول ناس فكرهم مترسخ ومتأصل بأفكار من سنين، زي أنهم يجيبوا 12 ملاية مع إن كفاية 4 بس، و2 تلاجة و4 شاشات و3 بوتجازات، وفي الآخر نسأل البنات ونلاقيهم مبيعرفوش يطبخوا.
