الممثلة شيرين لـ شيرين عبدالوهاب: كان لازم تتعالج نفسيًا من زمان
وجهت الفنانة شيرين، رسالة إلى المطربة شيرين عبدالوهاب، بعد أزمتها الأخيرة ودخولها أحد المستشفيات للعلاج من إدمان المخدرات، حسبما صرح شقيقها ووالدتها.
وقالت شيرين لـ القاهرة 24: بقول لشيرين كلنا بني آدمين وبشر، وكلنا بنغلط، وأنتِ صوت جميل وربنا إداكي موهبة وهتقومي وترجعي لجمهورك وبناتك وتفرحي بيهم.
وتابعت: أنا شايفة إنها كانت المفروض تتعالج نفسيًا منذ طلاقها من زوجها الأول، لأنها هي طلعت في كذا برنامج وعيطت وقالت أرجوك ما تسينيش، هي من زمان المفروض كانت تتعالج نفسيًا علشان نفسيتها تقوى، في ناس بتشوفيها زي العمارة الهايلة من جوه نفسيتها هشة.
وأضافت: شيرين موهبة عظيمة وهايلة وعندها صوت هايل وعبقرية لكن مش بتعرف تتكلم وده مش مش عيب، ولكن مطلوب منها تغني فقط، وحضرني موقفًا للست فيروز ربنا يديها الصحة الأستاذ عاصي الرحباني قال لها ما ترديش على التليفون تاني، لأنها صوتها هايل لما بتغني ولكن صوتها لما تتكلم أجش، علشان كده هي مالهاش حورات وده مش عيب لما الفنان يكون عندي عيب معين لازم يخبيه، لو رجلي وحشة ما ألبسش قصير.
التبرع للغارمات
من ناحية أخرى، ردت الفنانة شيرين على الانتقادات التي تعرضت لها بعد ممانعتها التبرع للغارمات، إذ قالت: قلت إننا مش لازم نتبرع للغارمات وما تكلمتش في الموضوع باستفاضة لأن ما كانش فيه وقت، الناس عندها موروث بيقول إني لازم أجهز بنتي بـ 24 بطانية و24 ملاية، وحاجات فوق الخيال وأنا بقول إن ده كتير على أي أب أو أي أم، في الوقت الحالي أو قبل كده.
وأضافت: أنا ضد أي ست أو راجل تتحبس والفقر عمره ما كان عيب أنا ست فقيرة أساسا بس أنا بفكر بعقلي ولازم الواحد يكون عنده قناعة ويعلم ولاده يكون عندهم قناعة.
