ربنا موفقني بشكل غير طبيعي وباخد رأي مراتي.. أبرز تصريحات بهاء سلطان مع أنغام
حل الفنان بهاء سلطان، ضيفًا على الفنانة أنغام، في برنامجها الذي يحمل اسمها والمذاع عبر شاشة قناة DMC، وتحدث خلال الجزء الثاني من الحلقة عن تفاصيل حياته الشخصية.
ويعرض لكم القاهرة 24 أبرز تصريحات بهاء سلطان في الجزء الثاني من برنامج أنغام:-
- الملحن مهم جدًا بالنسبة لي في كل الأغاني بتاعتي، بسيب كل واحد يشوف شغله ومابتدخلش.
- مبحبش أعيش في الدور لأني لو عشت هتبوظ مني، هي الفورمة دي ماشية كويس الحمد لله، وربنا موفقني بشكل مش طبيعي أوي.
- مراتي كانت بتغني وفي معهد فنون مسرحية ولكن مكملتش، وبحب أخد رأيها في الأغاني بتاعتي واللي بتقوله بيطلع صح.
- مراتي بتستوعب شخصية المغني، وهي فرقت معايا كتير.
- ساعات مراتي بتقولي إنت ليه مبتسمعش أغاني مختلفة تغير إحساسك وتغير من أدائك.
- كل اللي اشتغلت معاهم بحس إنهم إخواتي وأصحابي، وهما كمان كانوا بيدوني نفس الإحساس، وعمري ما فكرت ألحن وأعتقد إن ملكة التلحين مش عندي.
- أغنية أنا مصمم الشركة مكانتش عايزة تاخدها، وهي من ألحان رامي جمال، ورامي قالي أنا حاسس إني ملحنتش غيرها من كتر ما اتسمعت ونجحت.
- بقالي 3 سنين مش بنزل خيم رمضانية.. بقعد أصلى وأقرأ القرآن، وأقضى رمضان وسط أهلى، جربت كدة وطلعت حلوة.
- مش بذاكر الأغنية كتير، مرة ولا مرتين وأروح أسجل على طول، وبيتعبوا معايا في الاستوديو عشان مش بحفظ الأغاني.
- لعبت في أشبال الأهلى ومطلعتش أهلاوي أنا زملكاوي، وبقالي سنين ملعبش كورة.
- أبويا كان قارئ للقرآن وفاهم فى الأصوات وأمي كانت فى حالها.. لكن أخويا كان سميّع وبيحب الغناء هو اللي خد باله من موهبتي.
- أمي وأبويا حضروا شوية نجاحاتي لغاية ألبوم ومالنا، قبل أن يودعا الدنيا.. كنت أقعد في أوضتي وبغني للشيخ سيد النقشبندي وأحاكي الشيخ محمد رفعت ومحمد صديق المنشاوي.
