لغيت احتفال عيد ميلادي مدى الحياة وواثقة إني هقابل حسين الإمام.. أبرز تصريحات سحر رامي التليفزيونية
كشفت الفنانة سحر رامي تفاصيل وفاة زوجها حسين الإمام، مؤكدة أنها لن تتزوج مرة أخرى، وستظل زوجته حتى رحيلها، بجانب الحديث عن تربيتها لـ أولادها وسر جمالها.
وقالت سحر رامي، خلال لقائها في أحد البرامج التليفزيونية: أنا مش قادرة أقول إن حسين الإمام توفي، وساعات بكلمه وأقوله سايبنا ليه؟ وإحساسي أنه مشي شوية وواثقة إننا هنتقابل وأنا لحد ما أموت هفضل حرم حسين الإمام، ولا يمكن أتجوز تاني لأني مازلت متجوزة.
حسين الإمام مات في حضني
وواصلت سحر رامي: حسين الإمام مات في حضني ودا قدري، وهو دخل الحمام واتأخر وقلقت عليه وقالي أنا تعبان وسندته ولقيته دايخ ووقع وجه في دماغي أنه تعب من دخان الحمام، وفي أقل من 5 دقايق لقيته راح مني وكنت منهارة وبزعق وبصوّت، وتشخيص الدكتور قالي إنها جلطة مفاجئة ومش هتتلحق غير بـ حقنة بتتاخد في القلب خلال 10 دقايق، واحنا كنا في الطريق الصحراوي وملحقناش، وكان لا يمكن تتلحق ولو اتحلقت كانت هتسيب أثر وكان هيبقى مشلول أو أعمى ودا أوحش من الفراق ودي أول مرة تحصله وعمره ما اشتكى من حاجة وكان شيء غير متوقع.
وأضافت سحر رامي: أنا كنت مؤمنة بجميع آراء حسين الإمام ولما بيقول حاجة بقول له آمين، وناس كتير قالوا لي إن العين والحسد سبب في رحيله وفراقنا، بس الحسد مش هو القدر ولا تأمين نفسنا من العين هيمنع القدر المكتوب.
واستكملت سحر رامي حديثها، قائلة: أنا لغيت احتفال عيد ميلادي مدى الحياة بعد وفاة حسين الإمام لأنه كان بيحتفل معايا دايمًا مهما كان مشغول، ومكنش فيه حاجة بتشغلني ولا تضايقني طالما معايا جوزي وعيالي، وقولنا هنبيع كل حاجتنا في مصر عشان نسافر وقولتله أنا معاك في أي مكان تروح وفجأة قولت له مين يعيش، وكنت بقول كدا وأنا مش مركزة وافتكرته بعد وفاته.
وتطرقت سحر رامي للحديث عن سر جمالها حتى الآن على الرغم من مسئولية تربيتها لأولادها وحدها، قائلة: أنا أم لراجل عنده 30 سنة بس بحاول بقدر الإمكان أحافظ على نفسي، ولسه برقص وبلعب يوجا وبعمل تأمل ومستمرة وبخلي بالي من أكلي جدًا، وكانت أصعب حاجة تربية رجالة لوحدي بعد وفاة حسين الإمام، وحصلت لي فوضى مع إني عاقلة وهادية، ولكن الحزن القوي بيعمل فوضى في الدماغ، وكنت خايفة أضيع الولدين معايا لو أنا ضعت، واستنجدت بكل الناس وحبايبي وأهلي وإخواتي ووقفوا جنبي ودلوقتي عندي يوسف عنده 30 سنة وسالم 24 سنة، والمشوار كان صعب ومش عارفة عدى إزاي.
أما عن أمنيتها لأولادها، قالت سحر رامي: كل اللي بتمناه لأولادي إنهم يستقروا ماديا ويقابلوا بنتين يحبوهم ويكونوا نفس التاريخ زيي أنا وحسين، ومفيش مواصفات أهم حاجة المحبة.
كما تحدثت سحر رامي عن ظهورها في عدة أعمال كأم لفنانات كبار، قائلة: إني أطلع أم فنانة في عمل فني دا شيء عادي وببص للدور الأول وهل يناسبني ولا لا ولايق عليا سنًا وشكلًا ولا لأ، ومش بتضايق ولا أندم على حاجة وبحب الأعمال اللي بطلع فيها أم.
وكشفت سحر رامي حقيقة ارتدائها الحجاب، قائلة: أنا بعيدة خالص عن شائعة الحجاب، ودايمًا يربطوا بين الاعتزال والتمثيل، وأنا بعيدة خالص عن الموضوع ده، أنا مش متحفظة أنا طبيعية، ولو في أدوار مش بتناسبني مبعملهاش، ومش هحط فيها أسباب دينية أو أخلاقية لأني معنديش مانع أي حد يعمل أي حاجة، ومتعرضش عليا دور في بوس في الأفلام، ومعرفش لو اتعرض هعمل إيه لأني متحطتش في الموقف ده.
