خدت فتوى من الشيخ الشعراوي إني أمثل بالحجاب.. أبرز تصريحات عفاف شعيب في برنامج واحد من الناس
حلت الفنانة عفاف شعيب، ضيفة على الإعلامي عمرو الليثي، في برنامجه واحد من الناس، المذاع عبر شاشة قناة الحياة، وتحدثت خلال اللقاء عن تفاصيل حياته الشخصية، واعتزالها وعودتها للفن مرة أخرى.
ويعرض لكم القاهرة 24 أبرز تصريحات عفاف شعيب في برنامج واحد من الناس:-
- كنت رافضة إني اشتغل بالحجاب، ولكن لما لقيت فيه إصرار من المخرجين، روحت قابلت الشيخ متولي الشعراوي، وسألته عن تمثيلي بالحجاب قالي وماله اطلعي بحجابك يا بنتي وقولي كلمة طيبة وربنا يرضى عليكي.
- أنا خدت فتوى من أجدع راجل في الدين إني أمثل بالحجاب.
- حصل زمان اتعملي سحر كتير أوي، مش عايزة أقول مين اللي عملت السحر، ولكن السحر انقلب على الساحر، وفيه ناس عملولي سحر من جوا ومن برا الوسط.
- نا بحس إني مسحورة وبشوف رؤى وأنا نايمة، لأن ليا ورِد كل يوم، ومن لا ورِد له لا وارد له، والشعراوي قالي خلي دايمًا لسانك عامر بذكر الله.
- كان بيتعملي سحر علشان مشتغلش وإني أبقى قاعدة في البيت على طول، ومكتئبة، وأبقى موجوعة على طول.
- ما ندمتش على مشهد تعاطي الترامادول في مسلسل الكيف، لأني اندمجت في المشهد وحبيت الدور لأنه قصة حقيقية لوالدة مذيع كبير.
- ما هجمتش حلا شيحة وشهيرة وسهير رمزي لما خلعوا الحجاب، لكني زعلت عليهم ودعيت لحلا ربنا يردها ردًا جميلًا وربنا فعلًا ردها، وما قلتش حاجة تسيء لهم لكني زعلت أن كل واحدة قاعدة 27 سنة محجبة ليه يضيعوا السنين دي كلها.
- أنا ما وفقش أعمل دور تمثيلي بالباروكة طبعًا، صعب أعمل كده.. ليه باروكة؟! صابرين تغير الدور أفضل وتبقى بحجابها إيه اللي يمنع؟ ليه الباروكة؟.
- أحمد زكي كان بيصعب عليا لأنه كان طيب جدًا وناس كتير بتنبذه وفي أستاذ من الأساتذة الكبار لما شافه في معهد فنون مسرحية في سنة أولى قال له أنت جاي تعمل إيه هنا وتهبب إيه روح اشتغل في أي ورشة.
- لمجت أحمد زكي كذا مرة بيعيط ولما راقبته لقيته غلبان وطول الوقت قاعد لوحده ومش بيكلم حد.
- في ناس وقعت بيني وبين أحمد زكي في الحج بعد ما أقنعته يحج علشان ربنا يرضى عليه، اتاري في ناس قالوا له سيبك منها، وفي نفس الوقت في حد قال لي أنه ما قرأش قرآن في عرفة فسألته قال لي أنا شيطان من الشياطين! قلت له أوعى تكلمني تاني وبعد الحج جالي البيت واعتذر لي.
- مش زعلانة إني اتحرمت من الأمومة، وربنا عوضني بـ أولاد أخويا وإخواتي، كنت الأول في الحقيقة لقيت الدنيا خدتني أوي والسفر، وكنت حابة أبقى متواجدة وناجحة ومشهورة، ولكن دلوقتي مبتفرقش معايا.
- ربنا المعوض المخلف، ولقيت نفسي بتجر مع الأيتام والمعاقين والمكفوفين، فحسيت إن عندي إمبراطورية من الأولاد، والأول تبينت أطفال ولما كبروا لأ، ولكن دلوقتي بساعد ولكن مش بتبنى.
- هالة فؤاد الله يرحمها قالتلي تعالي احضري معانا مجلس علم واسمعي كلام ربنا وإنتي جواكي خير، وتأثرت جدًا وبقيت بعيط.
- كان فيه واحدة محامية بس فقيهة في الدين، أول ما شافتني قعدت تقول النار والجنة وهنتعذب وعذاب القبر، أنا خوفت واترعبت بجد، وناس كتير اتحجبوا على إيديها.
