ياسمين عز: أنا فخورة بـ شيرين لأنها طبقت كلامي بالمللي.. والدين بيقول مفيش كرامة بين الزوجين
أعربت الإعلامية ياسمين عز عن سعادتها البالغة بـ عودة الفنانة شيرين عبد الوهاب إلى طليقها حسام حبيب وزواجهما مرة أخرى، بعد خروجها من المستشفى.
وقالت ياسمين عز في تصريحات تليفزيونية: أنا مش جاية أشمت فيكم ولكن واحد ليا وصفر ليكم، وبقول لـ شيرين أنا فخورة بيكي وقلبي مفرفح من الفرحة، أنتي ست أصيلة، والست ملهاش إلا بيت جوزها وقولنا مفيش كرامة بعد الجواز ودا كلام الدين مش كلامي.
وواصلت ياسمين عز: وأهو قدامكم نجمة الدنيا طبقت كلامي بالمللي وبتقول له يا سي حسام، واعتذرت له قدام الوطن العربي كله، الله يرضى عليكي دنيا وآخرة.
عودة شيرين عبد الوهاب لـ حسام حبيب
أعلنت شيرين عبد الوهاب بالأمس، عقد قرانها من جديد من الفنان حسام حبيب، وذلك خلال مداخلة هاتفية مع الإعلامي عمرو أديب في برنامج الحكاية، وقالت: أنا اتكتب كتابي على حسام حبيب إمبارح بالليل، وحسام هو اللي أقنعني، وأنا في عصمة راجل طيب جدًا، وبعتذر لحسام عن أي كلام صدر مني في يوم من الأيام، واللي حصل ما بينا شيطان وبيحصل بين أي اتنين متجوزين، واحنا ضحية حاجات كبيرة أوي والحمد لله ربنا فكها بسلام، وأنا مستاهلش أعيش في الضلمة أو أعيش خايفة من حاجة.
وأضافت شيرين: أنا عارفة إن الناس هتقول عليا إيه، بس أنا زي أي بنت بتعبر عن إحساسها، وحبي لحسام على المشاع وهو حب حياتي، وشكرًا لكل الناس اللي قالوا كلمة حلوة واللي قالوا كلمة وحشة، وفترة وجودي في المستشفى كانت صحية وحولتها لمنحة واستفدت منها.
