سلوى محمد علي: إحنا بنستلف الفساتين وأجورنا انخفضت.. وفخورة إني اتولدت في حارة شعبية
تحدثت الفنانة سلوى محمد علي عن الانتقادات التي تعرض لها السيناريست تامر حبيب منذ فترة، مؤكدة أنه كاتب موهوب وخلوق، بجانب الحديث عن صعوبات التمثيل ونشأتها في حارة شعبية.
وقالت سلوى محمد علي لـ القاهرة 24: الجمهور يعاني من غضب مكبوت بسبب الظروف الاجتماعية وبيطلعه على الفنانين عبر مواقع التواصل الاجتماعي، زي ما حصل مع تامر حبيب واتهاجم بشكل كبيرمنذ فترة والناس اتهمته بـ ميول غريبة.
بعذر الجمهور لأنه شايفنا بنلمع وبنلبس فساتين
وواصلت سلوى محمد علي: كلمة ميول دي كلمة غريبة لأن الناس عرفت ميول تامر منين؟ لازم تتجوزه الأول وتعرف، وكمان منة شلبي تعرضت لهجوم غير مبرر وتشهير بسبب مستحضر تجميل ملهاش ذنب فيه.
وأضافت سلوى محمد علي: أنا بعذر الجمهور لأنه شايفنا بنلمع وبنلبس فساتين في المهرجانات الفنية، ولكن حتى الفساتين بنستلفها مش بنشتريها، والممثل مضطر يشتغل 36 ساعة متواصلة عشان يقدر يصرف على نفسه وياكل، والناس بقت تشتمنا بدون سبب وبيعاروني إني اتولدت في حارة مع إني فخورة إني طلعت من حارة شعبية وغنية بالناس اللي فيها.
وسبق وكشفت سلوى محمد علي عن رغبتها في اعتزال الفن، حيث قالت في تصريح سابق لـ القاهرة 24: أنا بفكر في الاعتزال بسبب طريقة تحصيل الضرائب؛ لأنها طريقة تعجيزية وكلها تكنولوجيا، ليه مندفعش الضرائب لـ شركة الإنتاج بدل من تحصيلها منا بشكل مباشر؟ أنا كان نفسي جنازتي تطلع من المسرح وأموت وأنا بمثل ولكن ده كان زمان ومش كل اللي نفسنا فيه بيتحقق.
