قالي الشنطة فيها آثار افتكرته بيهزر.. ماذا دار بين المتهم الرئيسي والفتاة في قضية سرقة متحف جامعة سوهاج؟ | تحقيقات
شغلت قضية سرقة آثار متحف جامعة سوهاج الرأي العام خلال الأسابيع الماضية، حينما أقدم 4 أشخاص - طالبان ووالد أحدهما وفتاة - على سرقة 59 قطعة أثرية من المتحف، عن طريق قيام الطالبين بتغطية كاميرات المراقبة، والتسلل إلى المتحف، وكسر الصناديق الزجاجية باستخدام أجنة حديدية، بينما تنتظرهم الفتاة في الخارج بسيارتها، وقيام الوالد بالتصرف في القطع.
سرقة آثار متحف جامعة سوهاج
ينفرد القاهرة 24 بنشر تحقيقات القضية، حيث استدعت جهات التحقيق الفتاة المتهمة وتدعى م.أ، تبلغ 20 سنة طالبة، وجاءت أقوالها كالآتي:
س: هل من ثمة حوار دار فيما بينك وبين المتهم ن.ك، وقت تقابلك معه؟
ج: أيوه أنا لما دخلت الجامعة وروحتله عند الأوضة بتاعت البودرة ملقتهوش فاتصلت بيه على التليفون فقالي إنه قدام الكلية، ولما وصلت هناك وحط الحاجة في الشنطة كنت بسأله إيه الحاجات دي، لكن هو مردش عليا وفي الآخر قالي استنيني عند الكورنيش.
س: هل استقل المتهم السيارة برفقتك؟
ج: لا هو مركبش معايا أنا كان معايا أصحابي.
س: ومن أي الأبواب دخلتي وخرجتي من حرم الجامعة؟
ج: من الباب الرئيسي اللي قدام نادي الشرطة.
س: أين تحديدا تقابلتي مع المتهم عقب خروجك من الجامعة؟
ج: هو لما قالي استنيني عند الكورنيش أنا معرفتش أستناه فين بالظبط ووقفت أستنيته عند السفينة اللي في أول الكورنيش اللي اسمها نايل استوري واتصلت بيه علشان اقوله أستناك فين، فقالي أستناه عند أول ركنة العربيات ومتفتحيش وجه ورايا كان راكب تاكسي وعدى جنبينا وشاور لي إني أمشي وراه فأنا اتحركت وراه لحد ما ركن آخر الكورنيش قبل نادي هيئة قضايا الدولة ونزل من التاكسي والتاكسي مشي وأنا نزلت من العربية.
س: ما الذي حدث آنذاك؟
ج: هو نزل من التاكسي اللي هو كان جاي بيه وجالنا فتحتله شنطة العربية راح واخد السجادة الملفوفة وراح بيها على الشط بتاع النيل وراح طلع منها حتة حديد كبيرة ورمي السجادة والحديدة في المية ورجع تاني أخد الشنطتين بتوعه، ولما بسأله إيه ده اللي في الشنط راح قالي دي آثار بس أنا ساعتها كنت فاكراه بيهزر فمخدتش كلامه بجد وخد الشنطتين بتوعه ومشي وأنا مشيت أنا وأصحابي.
س: ما هي وسيلة الاتصال فيما بينك وبين المتهم طوال ذلك الوقت؟
ج: إحنا كنا بنتكلم مكالمات علي التلفونات بتوعنا.
س: وما هي طبيعة العلاقة فيما بينك وبين سالف الذكر تحديدا؟
ج: هو زميلي في الجامعة وخرجنا مع بعض كذا مرة مع أصحابنا.
س: ما هي طبيعة الحوار الذي دار فيما بينك وبين سالف الذكر يوم الجمعة الموافق 20 أكتوبر 2022؟
ج: هو بعتلي علي الواتساب وقالي عاوزين نتقابل النهاردة الساعة أربعة ونصف أو تسعة ونصف فأنا سألته ليه مرضيش يقولي الأول وقالي خليها مفاجأة ولما قعدت أزن عليه قالي إنه عاوز يقابلني علشان حاجة في الكلية فأنا قولتله خليها لما نتقابل يوم الأحد في الكلية.
س: متى تحديدا علمتي بسرقة القطع الأثرية من متحف كلية الآثار بالجامعة؟
ج: يوم الأحد الفجر من الفيس بوك ولما حد من صحابي بعتلي الخبر.
س: هل شككتي في أمر المتهم ن.ك، في ذلك الوقت؟
ج: أيوة لإني افتكرت لما قالي على الكورنيش إن الحاجات اللي في الشنط دي آثار.
وقررت محكمة استئناف سوهاج، إخلاء سبيل الطالبة م. أ بالفرقة الثالثة كلية التربية النوعية، المتهمة في واقعة سرقة متحف كلية آثار جامعة سوهاج، بكفالة مالية قدرها 20 ألف جنيه.
