نهى العمروسي: الفن في دمي واتولدت بيه.. وممكن أموت قدام الكاميرا
كشفت الفنانة نهى العمروسي إمكانية اعتزالها الفن، مؤكدة أنها لم تفكر في الاعتزال من قبل بل منتظرة عمل قوي لـ تقدمه، بجانب الحديث عن صعوبات التمثيل ومعاناة الفنانين.
منتظرة عمل قوي أقدمه
وقالت نهى العمروسي لـ القاهرة 24: أنا عمري ما اعتزلت الفن بالعكس، وبفرح لما جمهوري من البنات يشوفوني في الشارع ويحضنوني ويقولوا لي بنحبك ووحشتينا، وأنا الفن في دمي واتولدت بيه وممكن أموت قدام الكاميرا، ومنتظرة عمل قوي أقدمه.
وواصلت نهى العمروسي: الفنانين مظلومين لأنهم تحت الأضواء على الرغم من أن الفن من أصعب المهن لأنه متعب نفسيا للفنان بعد تقمص شخصيات كتير وبيعيش معاناتها ومواقفها وبالتالي دا شيء متعب عصبيًا بصرف النظر عن الأجر سواء كبير أو صغير.
وسبق ودافعت نهى العمروسي عن الفنانة منة شلبي في أزمتها، وقالت في تصريح سابق لـ القاهرة 24: متأكدة أن منة متستاهلش أي حاجة ولا سجن ولا إن حريتها تتحبس وبدعي لها ولأمها يقويها ويديها القوة لحد ما تطلع من أزمتها ويا رب تقبل الأزمة والكرب وتكون متأكدة أنه امتحان من عند ربنا.
وواصلت نهى العمروسي: أنا اتعرضت لنفس التجربة القاسية دي وكنت مظلومة واتعمل لي اختبار دم، وملقوش حتى في جسمي نكوتين، والقاضي برأني، وكانت تجربة قاسية جدًا وكان فيها معاناة وكرب وحزن ومنتهى الألم والوجع لأن الواحد لما يكون مظلوم بيتسرق حريته ولكن ربنا اداني القوة رغم لحظات الضعف.
