الأضواء بتطفي من علينا وبترعب من أول يوم تصوير.. أبرز تصريحات سوسن بدر التلفزيونية
حلت أمس الفنانة سوسن بدر ضيفة على الإعلامية منى الشاذلي في برنامجها معكم، وكشفت تفاصيل بدايتها قبل التمثيل في مجال عرض الأزياء، بجانب الحديث عن علاقتها بأبطال مسلسل أبو العروسة، وأيضا عن كواليس مسلسل أم الدنيا.
وإليكم أبرز تصريحات سوسن بدر خلال الحلقة:
- بكون خايفة مع كل دور بيدي ليا وأول يوم تصوير بيكون بالنسبة ليا رعب ومش بتفرج على شغلي لما بيتعرض وبكون مستخبية من الناس مش عايزة الناس تشوفني.
- أنا تربيت على حب رائحة خشبة المسرح وستائره ودور الخالة آمونة لوالدتي في مسرحية ريا وسكينة هو الأقرب لشخصيتها ومحدش يقدر يقدمه زيها.
- أنا اللي بدأت مسرحية الواد سيد الشغال مع عادل إمام ولكن جات لي حصوة في الكلى ووصلت لمرحلة خطر فاضطريت اعتذر وكملته مشيرة إسماعيل.
- مش بهتم بمساحة الدور أبدا وده من شدة حبي لشغلي لأن ربنا مدانيش أي موهبة في أي حاجة غير التمثيل والطبخ بس.
- كلنا كان النور مبيطفيش من علينا لحظة وكنا بنجري من ستوديو للتاني ولكن مع مرور الوقت التلفون مابيرنش طول الوقت زي الأول والأضواء بتطفي.
- علاقتنا في اللوكيشن زي الأهل بظبط وبعتبر ولادي في المسلسل ولادي في الحقيقة وكنت بقرص مرزوق وبدرية في الحقيقة ومامتهم مكنتش بتزعل.
- كنت بقول للمؤلف هاني كمال مهما عملت أعمال ناجحة مش هتعمل حاجة بطبيعة وحالة أبو العروسة وسبب ارتباط بالناس بالمسلسل هو إنه شبهنا وشبه بيتنا أوي.
- قضيت فترة الثانوية بعروض الأزياء ورجاء الجداوي كانت أحد أعضاء التحكيم في اختبار العارضات وكانت أهم عارضة أزياء وقتها وكانت نموذجًا وملهاش زي.
