صاحبة دور شوكولاتة بـ صعيدي في الجامعة الأمريكية: بقيت شبه الشرشوبة وكل أدواري خدامة
تحدثت الفنانة مستورة، الشهيرة بدور شوكولاتة في فيلم صعيدي في الجامعة الأمريكية، عن بدايتها في التمثيل، وكذلك عن معاناتها مع حصر صناع الفن لها في دور الخادمة فقط، وهو ما يسبب لها إزعاجا مستمرا.
وقالت مستورة خلال لقائها مع القاهرة 24: أنا كنت بعمل ديفيليهات وأوبن داي كتير، وبعدين طارق العريان الله يكرمه شافني وقالي هاخدك في أغنية، وكانت أغنية عيني، وبعدها عملت إعلان شاي، وفيلم قليل من الحب كثير من العنف وفيلم ست الستات مع الأستاذ رأفت الميهي، وكان مؤمن بلوني عادي وكان بيرشحني ويقولي هتعملي معايا دور كذا.
وتابعت مستورة: واللون بيفرق طبعا، عشان كدة معرفتش أعمل حاجة بعد صعيدي في الجامعة الأمريكية زي كل اللي بيمثلوا بسبب لوني، وبقت أكتر الأدوار اللي بتجيلي دور شغالة، ونضفت بيوت مصر كلها تقريبا، بقيت زي الشرشوبة، مش كدة يا جماعة هو أنا مكتوب على وشي إني شغالة ولا إيه؟.
وأكملت حديثها في هذا السياق قائلة: قدمت دور عادي كمتسولة في مسلسل بنت من الزمن ده، مع الأستاذ محمد الغيطي وممدوح شاهين، والمخرج سامي محمد علي، وعملت الدور مع ريهام حجاج وداليا البحيري وكلنا طالعين متسولين، وكان دور رائع ومنساهوش، عشان بعيد عن دور الشغالة وأم الشغالة، بس رجعت تاني لدور الشغالة، جاتلي عقدة خلاص، نفسي أطلع من الجردل ودور الشرشوبة، أبقى زعافة حتى.
مستورة تكشف إصابتها بشلل نصفي
وكشفت مستورة أيضا عن الحادث الذي تعرضت إليها بعد فيلم صعيدي في الجامعة الأمريكية، في تصريح لـ القاهرة 24، وقالت: بعد فيلم صعيدي في الجامعة الأمريكية جاتلي جلطة شلل نصفي، بمشي بـ عكاز دلوقتي، وكنت الأول بمشي بكرسي بعجل والنقابة ساعدتني وهي اللي كانت بتسأل عليّا ودكتور أشرف زكي.
وتابعت موضحة تجاهل الفنانين لها وعدم السؤال عليها: حسين الشربيني ياما طلع واتكلم إن محدش بيسأل عليه، وعملت الفيلم وبعدها جالي شلل، والموضوع مضايقني عشان محدش سأل عليا هو الوسط كله كده، ومعتمد على الشللية.
