عمر خورشيد: المخرجين بيستكبروني على الأدوار.. وبعاني من سوء الاختيار
قال الفنان عمر خورشيد، إن والدته الفنانة علا رامي، رفضت دخوله الوسط الفني، ولكنه أصر ودخل المعهد العالي للفنون المسرحية دون علمها.
وقال عمر خورشيد، في تصريحات خاصة لـ القاهرة 24: والدتي مساعدتنيش في مشواري الفني، وهي كانت رافضة إني أمثل، ولكن أنا أصريت ودخلت المعهد من وراها، وبعد ما عملت أول مسلسل اللي هو أشرار وطيبين الناس كلموها واتفاجأت إني في المعهد، وهي كانت مفكرة إني في جامعة لأني كنت في حاجة تانية وحولت لـ معهد فنون مسرحية قسم تمثيل وإخراج.
وعن فكرة ترشيح والدته الفنانة علا رامي له للمخرجين، رد عمر خورشيد قائلًا: أكيد طلبت منها ترشحني لـ مخرجين ولما بقت ترشحني المخرجين بقوا يقولوا لأ عمر مش هيوافق لأن الدور صغير، يعني هما مستكبريني دايمًا على الشغل ده، ومفيش حد عرض عليا عشان أعرف الدور صغير فعلًا ولا لأ.
عمر خورشيد
وعلق عمر خورشيد، على التصريح السابق لوالدته بأنه يعاني من سوء الحظ، قائلًا: أنا مش بعاني من سوء الحظ ولكن سوء الحظ بيكون في الاختيار وعدم السعي، وكل حاجة بتوفيق ربنا.
وأضاف: أنا اللي عندي مشكلة في موضوع الاختيارات يعني بيتعرض عليا 5 أفلام في السنة بوافق عليهم كلهم، وفي الآخر واحد أو اتنين بس اللي بيتصوروا ومبيتعرضوش، فهو مش سوء حظ هو سوء اختيار.
