مبشربش الحاجات دي.. التحقيقات تكشف مفاجأة في قضية منة شلبي | خاص
كشفت التحقيقات في واقعة اتهام الفنانة منة شلبي، أن المخدرات المضبوطة بحوزتها، كانت بقصد التعاطي وليس الإتجار، وبناءً عليه لم يتم توجيه تهمة الإتجار في المواد المخدرة، وسُطر المحضر بتهمة التعاطي.
قضية الفنانة منة شلبي
وحصل القاهرة 24، على التحقيقات في القضية التي حملت رقم 19162 لسنة 2022 والمتهمة فيها الفنانة منة شلبي
وشرعت جهات التحقيق في سؤال المتهم:
س: ما قولك فيما هو منسوب إليك من أنك متهمة بحيازة جواهر مخدرة بقصد التعاطي في غير الأحوال المصرح بها قانونًا؟
ج: محصلش.
س: ما الذي حدث إذن وما هي ظروف ضبطك وإحضارك؟
ج: اللي حصل إني كنت مسافرة نيويورك علشان أحضر مهرجان انتر ناشونا لابي اورد النهاردة الصبح ووصلت مطار القاهرة وعديت على الجمارك، وأنا خارجة وكان معايا تلات شنط والدنيا كانت زحمة وأنا حطيت الشنط اللي معايا على السير علشان يتشاف فيها إيه ولقيت واحد من اللي واقفين في الجمرك بيقولي معاكي فيب سجارة إلكترونية، فأنا قولتله إني بدخن فيب وكنت بفتح الشنطة علشان أوريله الفيب، فلقيت واحد تاني جه وقالي إحنا هنفتح بقية الشنط نشوفها وأنا وافقت وقولتله اتفضل، وقعد يقلب في الشنط وبعدين جه واحد تالت كان بيفتش معاهم وأنا طلعت الفيب السجاير الإلكترونية وواحد منهم قالي ممكن تقعدي شوية ووداني أوضة في الجمارك قعدت فيها شوية والشنط كانت معاهم في الوقت ده، وبعد شوية لقيت ناس كتير وظباط مطلعين علبة ميكب لونها أخضر بيقولولي إن دي فيها ماريجونا فقولتله مفيش الكلام ده مش صح وده ميكب عادي.
وأضافت المتهمة منة شلبي أمام جهات التحقيق قائلة: فلقيته بيقولي معاكي كوكايين، قولتله أنا مش بشرب الحاجات دي أصلا وبعدين قالولي طيب استني شوية، وبعدين بقيت سامعة کلام کتیر بره، وبعد ساعتين تلاتة لقيتهم بيقلولي اطلبي المحامي بتاعك فبقولهم إيه اللي حصل، قالولي إنتي معاكي ماريجوانا، وبعدين قالي إنتي هتتعرضي على النيابة، وبعدين وأنا قاعدة لقيت أخبار نازلة إني مقبوض عليا ومعايا مخدرات وفضلت هناك لحد اما جيت هنا واتعرضت على النيابة
س: متى وأين حدث ذلك؟
ج: الكلام ده حصل النهاردة الصبح 20-11-2022 حوالي الساعة 10:30 صباحًا بمطار القاهرة الدولي.
س: ما سبب ومناسبة تواجدك بالمكان في هذا الزمان؟
ج: أنا كنت راجعة من رحلة سفر من نيويورك من مهرجان كنت بحضره هناك.
