قاتل محامي كرداسة: ابن عم مراتي قالي إنها بتقيم علاقات محرمة وبتشرب مخدرات.. وبنداري ضحك عليّا
يواصل القاهرة 24 نشر التحقيقات في قضية مقتل بنداري حمدي محامي كرداسة، بعد أن أطلق عليه وابلا من الرصاص داخل مكتبه بمنطقة أبو رواش بكرداسة في محافظة الجيزة.
قضية مقتل المحامي بنداري حمدي
وعن علاقة زوجة المتهم وتدعى نورا بالقضية، قال المتهم: اتجوزت نورا برغبة من البنداري، رغم إني رافع قضية ضد أهلها، وبعد ما أخدوا براءة سابت البيت وهي على وش ولادة، وبعدها ولدت وأنا أخدت البنت منهم، وفضلت ساكت وكبرت دماغي وقلت اللي حصل حصل أنا بنتي معايا وهربيها وخلاص، لحد ما في مرة ابن عم نورا طليقتي قابلني وقالي إن نورا بتقعد في وسطهم وبتشرب معاهم مخدرات، وبيقيموا معاها علاقات محرمة، ووقتها مسكنا في بعض واتخانقنا وعورته هو واللي كانوا معاه، وراح عملي محضر وساعتها أنا قلتله هي حرة في نفسها وأنا كده كده معايا بنتي ومحدش هيعرف يقربلها، وبعدها أهل نورا ولعوا في بيتي مرتين وأبويا راح عمل محضر بالكلام ده، ولقيت إن بنداري هو اللي بيدافع عنهم في القضية دي، وبعد فتره لقيت الأستاذ بنداري رافع قضية عليا بحضانة بنتي مريم وأخد حكم وجت قوة خدت من أمي مريم بنتي ومشيوا، واكتشفت إن في حكم غيابي حبس 3 سنين، الأستاذ بنداري هو اللي قالي.
وعن علاقك المجني عليه بنداري المحامي بالقضية، قال المتهم: أنا كنت بعتله أبويا عشان يشوف حل للمشاكل دي، وهو قال لأبويا الكلام ده لما راح عشان يخلص المشاكل دي، وأنا عايز أقول إن في الواقعة دي أنا عملت توكيل لمحامي تاني اسمه كامل خليفة من البلد عندنا، وأبويا عمل توكيل لمحامي تاني والمحامي هو اللي قاله.
وتابع قاتل البنداري: نورا وأهلها قالولي إن هما عاملين توكيلات، وإن بنداري معاهم مش معايا، مع إن أنا عامل له توكيل قبلهم، وطلع هو متفق معاهم على كل حاجة، وكان بيضحك عليا وبياخد مني ومن أهلي فلوس أتعابه، وهو شغال مع أخصامي وأهل طليقتي بوظولي حياتي.
