برلنتي طليقة سعد الصغير تكشف عن تفاصيل خلافهما: ضربني وجابني من شعري
كشفت الممثلة برلنتي عامر، طليقة الفنان سعد الصغير، تفاصيل خلافهما الأخير قبل الانفصال، واعتدائه عليها وعلى والدتها وشقيقتها.
وقالت برلنتي عامر، في تصريحات تلفزيونية، أنها كانت برفقة سعد في منزلهم قبل الحادث بساعات قليلة ولم يكن هناك أي خلاف بينهم، ومن ثم نشب خلاف بسيط إلى أن تطور الأمر حد الاعتداء عليها من قِبل سعد الصغير، موضحة: أنا كنت قاعدة معاه في الفيلا وكنا كويسين جدًا ومفيش مشاكل، وشدينا مع بعض وبعدين جه يوصلني وإحنا في شارع الجيش في حدائق الأهرام ضربني وجابني من شعري ونزلني من العربية عشان يضربني في الشارع.
وتابعت برلنتي، أنها سارعت في الاتصال بوالدتها وشقيقتها حتى يذهبوا إليها لينقذوها من الاعتداء، قائلة: كلمت ماما واختي علشان ياخدوني، وأول ما جم شتم وقال ألفاظ وركبت مع ماما العربية، وهو جري ورانا بسرعة ودخل في عربيتنا من ورا نطرنا وضرب زجاج عربية ماما بالطوب وأختي دماغها اتفحت، والعربية اتدمرت.
وأعربت برلنتي عامر، عن استايئها الشديد بسبب تلقيب الجمهور لها بلقب الراقصة، مؤكدة إنها لم تمتهن هذا المهنة مطلقًا بل إنها ممثلة، قائلة: أنا مش رقاصة والموضوع ده بيضايقني جدًا وعايزة حد يجبلي صورة ببدلة رقص، يمكن عشان سعد كان له علاقات مع رقاصات افتكروني رقاصة، ولكن أنا ممثلة.
وأضافت طليقها الفنان سعد الصغير، كان يتواصل مع المنتجين ليخرجها من الأعمال التي تشارك بها، موضحة: من أول مرة شافني فيها وهو مُتيم، ده أذى مش حب، وأنا لما بدخل شغل بيكلم الناس من ورايا ويمشيني من الشغل، وروحت صورت قبل كده في مسلسل وبعدين اتشالت منه، عنده حب تملك وجمد حياتي.
ونفت برلنتي عامر، حصولها على مبلغ مالي من طليقها سعد الصغير، موضحة: سعد الصغير بيقول إني أخذت منه 75 الف جنيه، وأنا لو عملت كده كنت ممكن أعمل أكتر واخد منه ملايين، وهو نفى إني عملت كده وقال إني قطعت الباسبور بتاعه وأنا هعمل ليه كده؟
واختتمت برلنتي عامر، حديثها موجهة رسالة لـ طليقها الفنان سعد الصغير، قائلة: أنا عملتله إيه عشان سعد الصغير يأذيني كده، وأنا مش هعرف أصدق حد بعد اللي عمله معايا.. ربنا يسامحك ويبعدك عني وعن طريقي، وربنا يسهلك بعيد عني وعن أمي وأختي..كفاية إنه ربنا عالم باللي جوايا، أنا بقيت واحدة متكسرة.
