وفاء مكي: فاض بيا.. ومش هقبل يرمولي أي مساعدة أو دور أقل عن المستوى
أعربت الفنانة وفاء مكي، عن استيائها الشديد بسبب عدم مشاركتها في أعمال فنية خلال الفترة الماضية، مُشيرة إلى أنه لا يوجد مصدر دخل آخر لها سوى التمثيل، بالإضافة إلى تراكم الديون عليها.
وقالت وفاء مكي، باكية خلال حوارها مع القاهرة 24: أنا خلاص فاض بيا ومش قادرة استحمل، بقالي 10 سنين عليا ديون بـ 500 ألف، وأمي ست عيانة وفي حالة خطر وعندي التزامات وخدت قرض، وعايشة على معاش والد ابني 3 آلاف جنيه في الشهر، والقرض بيتم سداده على 31 شهر لمدة سبع سنين.
وأكدت وفاء مكي، أنها لن تقبل بأي مساعدة لن تكون من مستواها الاجتماعي كفنانة، وأنها تريد العودة من جديد للمشاركة في الأعمال الفنية، موضحة: أنا عاوزة أقف على رجلي وآكل لقمتي بعرق جبيني، شوفوا أنا كنت إيه ومحتاجة يرمولي أي حاجة وماينفعش أقل عن المستوى.
وفاء مكي
ومن ناحية أخرى، سبق وعلقت الفنانة وفاء مكي، في تصريحاتها لـ القاهرة 24، على حديث الجمهور على قضية تعذيب الخادمتين، التي لاحقتها منذ فترة، قائلة: مش فاهمة الناس اللي بيتكلموا على قضيتي اللي بقالها 30 سنة ليه؟ إيه علاقة القضية بـ أكل العيش والشغل؟ الناس مبقتش بترحم ولا اللي عايشين ولا الميتين في الوسط الفني.
وأضافت وفاء مكي: أنا سكتت سنين كتير وتعبت أنا مديونة هو أنا وجه جديد وحد هيكتشفني؟ ومش عايزة حد يرميلي دور أي كلام وكأني بطلب إعانة أنا عايزة اشتغل من عرق جبيني، ومش عايزة حد يديني حاجة لله، وأنا ست بتقي الله وبيني بين ربنا عمار، ومش بعمل حاجة حرام دا أنا بقول عايزة أشتغل.
