رامي صبري: معنديش مشكلة أقعد سنة من غير ما أعمل أغنية.. وأمنيتي سعر الدولار ينزل
كشف الفنان رامي صبري، عن أمنيته في العام الجديد 2023، متمنيًا أن ينخفض سعر الدولار واستقرار الحالة الاقتصادية في البلاد، بجانب الحديث عن أجدد ألبوماته معايا هتبدَّع.
وقال في مداخلة هاتفية ببرنامج التاسعة الذي تقدمه الإعلامية شافكي المنيري، والمذاع عبر شاشة قناة الأولى المصرية: أول حاجة عايزها في 2023 إن الدولار ينزل، والحالة الاقتصادية تتظبط مع الناس واللي مبيشتغلش يشتغل، لأني بزعل جدًا لما بشوف على فيس بوك إن فيه حد مبيشتغلش بيأثر في نفسيتي وإني لازم أعمل حاجة، وأنا عملت حفلة لـ مستشفى الناس تبرعًا مني.
وتابع: الرئيس لما كان بيطلع يقولنا إن كل واحد في شغله يقدم اللي يقدر عليه، أنا بحاول وبحاول إني أساعد لو حد مبيشتغلش أساعده.
ألبوم رامي صبري معايا هتبدَّع
كما تحدث الفنان رامي صبري، عن ألبومه الجديد معايا هتبدَّع، قائلًا: أغنية هتبدَّع عملها عزيز الشافعي، وعملتها في الآخر خالص وانضمت في الألبوم عشان تنفع في سهرات وحفلات بالليل في كل مكان، ومتصورتش لأنها اتعملت في الآخر وقت المونتاج.
وأضاف: بقالي كتير معملتش ألبوم من ساعة ألبوم حياتي مش تمام، ولكني كنت بحضر والأغاني لما بتتقدم على طول الناس بتطلبك على طول، والموضوع مبقاش مقتصر على التلفزيون بس لأ بقى فيه سوشيال ميديا وكان لازم نشتغل على السوشيال ميديا والفيديو كليب.
وعن فكرة كليبات الألبوم، قال معلقًا: فكرة الألبوم كنت عايش وسط الكلام والمزيكا بين ألحاني وألحان ناس تانية، واكتشفت إني ممكن أطور الألبوم ده كله زي إعلان حتى لو هصور من كل كليب 40 ثانية، والناس اللي شغالين معايا لأني بنتج لنفسي بقالي سنتين، قالولي الموضوع هيبقى متعب جدًا وتكاليف عالية والتكاليف ممكن مترجعش تاني، لأن اليوتيوب مش بيدفع فلوس على طول.
واختتم رامي صبري، أنه لم يهتم مطلقًا بتكاليف الفيديو كليب والأهم بالنسبة له هو جودة الأغنية والكليب، موضحًا: عمري ما فكرت في موضوع التكاليف لأنه مش بتاعي ولا عمره يكون بتاعي، والمهم عندي جودة الفيديو والأغنية، ومفيش عندي مشكلة أقعد سنة من غير ما أعمل أغنية بس تطلع بالشكل اللي أنا عايزه.
