أحمد السبكي يرد على تبرؤ محمد رمضان من عبده موتة: أنا كمان لو رجع بيا الزمن مش هعمله
رد المنتج أحمد السبكي على تبرؤ الفنان محمد رمضان من فيلم عبده موتة الذي قدم بطولته عام 2012.
وقال أحمد السبكي لـ القاهرة 24: لما رمضان عمل عبده موتة ما كانش لسه محمد رمضان، وأنا كمان لو رجع بيا الزمن ما كنتش هعمله لأن الدنيا بتطور مش علشان فيه رسالة سيئة ولا علشان البلطجة، وأفلام السبكي أحسن أفلام وعبده موتة مات في الآخر، يعني كل واحد بيمشي غلط ربنا بيدي له على دماغه.
وأضاف أحمد السبكي: وأنا ما زعلتش من كلام محمد رمضان ولا عمري أقدر أزعل منه، والانتقادات مش بتضايقني وما يهمنيش رأي الناس.
محمد رمضان: لو رجع بيا الزمن مش هعمل عبده موتة بنفس الشكل
وكان محمد رمضان علق على الانتقادات التي تعرض لها بسبب فيلم عبده موتة، وقال خلال استضافته في ليلية رأس السنة ببرنامج معكم الذي تقدمه الإعلامية منى الشاذلي، إنه عندما قدم فيلم عبده موتة كان عمره 24 سنة، مشيرًا إلى أنه لو عاد به الزمن لن يقدمه بنفس الشكل.
وأضاف محمد رمضان: أنا عقلي بقى أنضج وبقى عندي رؤية أشمل، لكن أنا ما كنتش متوقع إن الفيلم هيكسر السينما، مردفًا: أنا عارف إن جمهور كبير بيشوفني وبدخل بيوت ناس وبشكل جيل وبأثر في جيل، ولو رجع بيا الزمن كنت هعمل نفس القصة بطريقة تانية، لكن حسن النية واضحة في نهاية الفيلم لأن عبده موتة اتعدم صغير وما طلعتوش منتصر، وأنا رؤيتي اتغيرت وما كنتش أعرف أنا هبقى فين عند الجمهور.
