الفنان مينفعش يكون تخين ومنظره كئيب.. نادية الجندي عن سر جمالها: لازم نكون قدوة للجمهور عشان يحترمنا
كشفت الفنانة نادية الجندي سر جمالها ورشاقتها، مشيرة إلى أن الفنان يجب أن يكون قدوة ونموذجًا للجمهور، وأن يحافظ على مظهوره ولياقته.
وقالت نادية الجندي خلال مداخلة هاتفية ببرنامج الستات: الفنان لازم يكون قدوة ونموذج للناس، ولما بحافظ على شكلي بحس إني بحترم جمهوري، ولما بيشوفوني بيقولوا لي إحنا بنحبك علشان بتحترمينا، لأن الفنان ما ينفعش يطلع بشكل تخين ومنظره كئيب، وده جزء من عملي إني أكون ملتزمة طول الوقت بشكلي ولياقتي البدنية، لإني بعمل أدوار صعبة وكلها أكشن وده جزء من عملي.
وأضافت: النهادرة الثقافة العامة إن الستات والرجالة يهتموا بشكلهم ورشاقتهم، وأصبح هناك اهتمام بثقافة الرياضة والرشاقة والتجميل ودي حاجة الناس ما كانتش بتهتم بيها زمان، ومالهاش عمر ولا سن سواء صغيرين أو كبار، لأن الوعي زاد أوي ودي حاجة جميلة.
نادية الجندي تكشف طرقًا للحفاظ على الجمال والرشاقة
وأكدت نادية الجندي على أهمية الرياضة، قائلة: الرياضة شيء مهم جدًا للناس كلها، والحرمان سر رشقاتي لأني حارمة نفسي من الأكل طول الوقت.
وأشارت نادية الجندي إلى أنه على الرغم من أهمية الرياضة فإنها جزء من الاهتمام باللياقة والرشاقة وليست الأساس، قائلة: هناك أمور أخرى مهمة أولًا ربنا فوق أي حاجة لأنه بيدي الإنسان الشكل الحلو والكاريزما والروح الحلوة اللي بتخلي الناس تحبه وتتقبله ولما يلبس أي حاجة بسيطة تكون فخورة به وحباه في كل الأوضاع لأن ربنا في كل اعتبار.
وأضافت: ثانيًا التصالح مع النفس لا تحقدي من حد ولا بتغيري لأن كل ده بيعمل تجاعيد وبيظهر على الوش بتلاقي الواحد شكله كئيب وكله غلّ، لكن لما تتصالحي مع نفسك وتتمني الخير لكل الناس بيطلع على وشك ويبان وعلى تصرفاتك وأسلوبك.
وأضافت: الإنسان لما يكون كئيب غير لما يكون سعيد والسعادة بتيجي من الرضا بالنفس وتبقي سعيدة وحابة كل اللي حواليكي.
وأكدت نادية الجندي أن الحرمان من الأكل يعد عذابًا، قائلة: الحرمان من الأكل بيخليكي مش بتاكلي أي حاجة غير حاجات معينة ولو كلتيها تأنبي نفسك وتعاقبيها وتمشي على نظام تاني علشان تعوضي اللي بوظتيه ودي تضحية أنك تحرمي نفسك من الأكل وإنك تلتزمي بالرياضة ونطام معين وتنامي بدري.
