شريف مدكور: رفضت أعمل إعلان لسنتر طبي.. لأن صحة الناس مش سلعة
أكد الإعلامي شريف مدكور، أنه رفض تصوير إعلان عن سنتر طبي مقابل مبلغ مالي خوفًا على صحة الناس.
وقال شريف مدكور خلال برنامجه التلفزيوني «4 شارع شريف»: عندي مبدأ مش بغيره في الحياة ماشي عليه طول عمري، من يومين كلموني ناس قالوا لي عاوزينك في سنتر طبي خاص بعلاج أسنان ومخ وأعصاب وجلدية، تقول كلمتين وتبارك ونصورك وتحطها عندك على صفحتك في فيس بوك وانستجرام وهندفع لك رقم.
وأضاف: قلت لهم أنا مش هاجي عشان لو جيت ونشرت الكلام ده الناس هتيجي، وأنا إيه اللي يعرفني بالدكاترة، وهتعمل إيه في الناس، أفرض الدكاترة مضروبة الناس هتقول عليا إيه، ممكن محل هدوم لكن صحة الناس مش سلعة.
شريف مدكور: مش هتجوز نهائي
وفي وقت سابق، صرح شريف مدكور، بأنه لن يتزوج للأبد، لأنه يرى أن الزواج مسؤولية كبيرة، مشيرًا إلى أنه لن يكون على قدر هذه المسؤولية وأنه سعيد لأنه يعيش بحريته ولا يريد أن يلتزم بزوجة وأولاد، إذ قال في تصريحات لـ القاهرة 24: ربنا قال من استطاع منكم الباءة فليتزوج ومش كل الناس عندها قدرة تتجوز، أنا واحد عايش بحريتي ومش عاوز التزم بزوجة وأطفال وربنا ما فرضش الجواز على حد.
وكان شريف مدكور أثار جدلًا كبيرًا بتصريحاته بشأن المحجبات، حيث صرح بأنه يلزم الفتيات المحجبات في برنامجه بارتداء ملابس واسعة، وهو الأمر الذي عرضه لبعض الانتقادات، ورد عليها في تصريحات لـ القاهرة 24 قائلًا: المحجبة مش حرة وليها زي خاص لأنها اختارت تلتزم ليه تلبس ضيق؟، والناس التانية أحرار لأنهم مختاروش يتحجبوا، واللي قررت تتحجب قررت تلتزم، واختارت لبس السيدة الملتزمة، والناس دخلوا المواضيع في بعض وافتكروا أني بعمل كده علشان ملتزم.
