محمد عبد السلام عازف الأورج لـ مصطفى كامل بعد حل أزمته: يا رب تفضل في النقابة على طول
نظّم الفنان مصطفى كامل نقيب المهن الموسيقية، جلسة للتحقيق وحلّ الأزمة بين عازف الأورج محمد عبد السلام وأحد منظمي الحفلات، بعدما حرّر الأخير ضده شكوى بنقابة المهن الموسيقية نتيجة لمستحقات عمل سابق بينهما.
وقال محمد عبد السلام خلال جلسة الصلح بحضور مصطفى كامل وحلمي عبد الباقي: شوية خلافات بسيطة وفلوس هترجع والحمد لله مفيش حاجة، ومصطفى كامل كان حقه يوقفني علشان مش باجي النقابة، وأنا الحمد لله احترمت النقابة، ومصطفى كامل حلها وقعدنا قعدة عرب والفترة اللي جاية شغل.
ربنا يعزك وتفضل في النقابة على طول
وأضاف موجهًا حديثه إلى مصطفى كامل: عجبني كلامك أنك بتقول مفيش رشوة في النقابة طول ما أنت موجود، أنا سمعت الجملة دي وشعري شاب يا سيادة النقيب، ربنا يعزك وتفضل في النقابة على طول.
من جانبه، قال مصطفى كامل إن محمد عبد السلام أقرّ بأنه ملتزم برد المبلغ المالي خلال 24 ساعة، وبمجرد تنازله عن المبلغ سيتنازل الطرف الآخر عن القضية التي رفعها ضده.
وأضاف مصطفى كامل: دور النقابات تصليح الأوضاع بين الجميع في النقابة، وأن يأخذ كل شخص حقه، مضيفًا: هدفنا أن يعمل الجميع بنحاول نوفق الموضوع بينا وبين بعض، والحمد لله الاتنين مرضيين ومفيش مشكلة، والموضوع خلص بمنتهى السهولة.
بدوره قال أحد متعهدي الحفلات صاحب الخلاف مع عازف الأورج: احنا الاتنين كنا تايهين لمدة سنتين، وبعد الجلوس مع مصطفى كامل في أقل من نص ساعة الحدوتة خلصت، بدون ما حد فينا يخرج زعلان.
وأضاف: ربنا يعزك وتفضل ثابت في مكانك وإذا كنت تحلق مع النسور والصقور في السماء فلا تنظر لما يفعله الدجاج في الأرض.
