بدرية طلبة لـ ياسمين عز: الواحدة ملهاش نفس تدلع جوزها
علقت الفنانة بدرية طلبة على نشرها فيديو ردا على تصريحات الإعلامية ياسمين عز، إذ أكدت أن الفيديو للمزاح فقط ولا يوجد أي خلافات بينهما.
وقالت الفنانة بدرية طلبة في تصريحات لـ القاهرة 24، إنها تربطها علاقة صداقة قوية بـ الإعلامية ياسمين عز، مشيرة إلى أن الجميع يختلف مع تصريحات الأخيرة، قائلة: مفيش أصلا حوار إني أختلف أو أتفق معاها مفيش أصلًا موضوع، والفيديو بتاعي من باب الهزار حتى أنا شيرت الفيديو على إنستجرام وعملتلها منشن وإحنا عاملين لبعض فولو على انستجرام، وأنا روحتلها ضيفة قبل كده، وهي صاحبتي وحبيبتي ومفيش بيننا حاجة وحشة ودا كله من باب الهزار.
وعن الفيديو المنتشر لها على مواقع التواصل الاجتماعي، قالت بدرية طلبة: ما ينفعش يعني يكون جوزي قاعد وأقوله يا أستاذ محمد ويا باشمهندس دا مش الطبيعي، وما ينفعش واحده تحط مشبك في مناخيرها وتخنف وصوت شتوي وصوت صيفي.
وتابعت بدرية: كان زمان الست تقول لجوزها يا سي محمد أو يا سي السيد.. بس إحنا في تقدم، الدنيا بتتقدم وبعدين التطورات اللي حصلت كانت للأسوأ في حياة العالم كله ومفيش نفس لواحدة تدلع جوزها.
وأضافت بدرية طلبة: الفيديو بتاعي من باب التهريج، وبعدين أنا شايفة إن هي برضه اللي بتقوله مش معقول، ومحدش يقتنع باللي هي بتقوله، كل الناس بتسأل بتقول هو في إيه بالظبط والكلام اللي هي بتقوله إيه بالظبط، وأنا شايفاها إنها بتقول حاجات الناس كلها بتعلق عليها.
واستكملت بدرية طلبة حديثها: مفيش مشكلة إن الراجل يساعد مراته وهو نازل وياخد الزبالة.. لكن برضه الدنيا اتطورت وبقى يطلع زبال وياخد الزبالة، وعادي لو الزوجة تقول لجوزها خد يا حبيبي الزبالة في إيدك وأنت نازل.
فيديو بدرية طلبة
وكانت الفنانة بدرية طلبة نشرت فيديو على موقع تبادل الصور والفيديوهات انستجرام، تعلق فيه على تصريحات الإعلامية ياسمين في برنامجها المذاع على قناة MBC مصر، إذ قالت بدرية طلب في الفيديو: إيه يا ياسمين إحنا ماشيين بالعلاج، كل واحدة فينا فيها اللي مكفيها، اللي متجوزة ومستنياها تقول يا أستاذ محمد فيها اللي مكفيها، بدل ما تطول في المد بالألف مفيش وقت الناس بتكح تراب وانتي جاية تقوليلها مدي بالألف، شوفنا دلع كتير ياختي لكن أول مرة اسمع واحدة تدلع زوجها بمد في اسمه أحمااااااد أو محماااااااد.. لو قلت لجوزي كده هيديني بطبق الملوخية.
