بابا سباك وأفتخر.. رسالة دعم مؤثرة من فتاة بالسويس لوالدها
بابا سباك وأفتخر.. صاحبي وأخويا وكاتم أسراري.. بهذه الرسالة المؤثرة كتبت فتاة رسالة لوالدها عبر موقع التواصل الاجتماعي فيسبوك، لدعمه وتشجيعه في عمله، ولاقت الرسالة انتشارا واسعا بين الصفحات التي اعتبرتها قدوة حسنة للتربية السوية.
رسالة الفتاة
وقالت الفتاة وتُدعى هند خالد في رسالتها لوالدها عبر موقع التواصل الاجتماعي فيسبوك: بابا سباك وأفتخر، البوست ده في حب بابا، ده مش بابا بس، ده صاحبي وأخويا وكاتم أسراري، اللي بجري عليه وأحكي له ويفضل ينصحني.
وأضافت هند في رسالتها: عاوزة أقولك يا بابا، أنا بأشكرك على كل حاجة أنت ادتهالي أنا وأخواتي، من حنية وطيبة وبساطة وجدعنة، علمتنا ازاي نمشي عدل علشان يحتار عدونا فينا، علمتنا ازاي نخاف على بعضنا، أنت جبت 3 بنات وراجل بس الأساس أحنا 4 رجالة.
واستكملت هند قائلة: مهما أتكلم عنك مش هاقدر أعطيك حقك، أنت أكبر نعمة أنعم الله علينا أنا وأخواتي وماما، عارفة ومتأكدة إنك بتشقى علشانا، ودايمًا تعلمنا نتعب علشان نجيب قرش حلال.. شغلك صعب وبخاف عليك وأنت متعلق في الهواء ومن دور عالي، بس أنت دايمًا بتقول أن الشقيان كسبان ودايمًا فخورة بيك، بابا سباك وأفتخر.
وأشاد رواد مواقع التواصل الاجتماعي برسالة الفتاة لوالدها، وجاءت تعليقاتهم داعمة لها على حسن تربيتها وتقديرها وفخرها بوالدها.
