أول تعليق من سعد الصغير على اتهامات الراقصة شمس: جبتلك فيلا وعربية مجبتهاش لأم العيال
رد الفنان سعد الصغير على اتهامات الراقصة شمس له بخطفها والتعدي عليها بالضرب خلال فترة حملها، بجانب الكشف عن حقيقة تصويرها أثناء نومها وهي مجردة من ملابسها.
وقال سعد الصغير في تصريح لـ القاهرة 24: أنا أولًا معنديش أرض في العين السخنة عشان أخطف حد، والأزمة رجعت تاني حاليًا بسبب طلب شمس لفلوس وغيرتها من زوجتي برلنتي، وشمس مش أول مرة تعمل الكلام ده وكل فترة تطلع تقول نفس الكلام.
وأكد سعد الصغير أنه لم يصوّر شمس أثناء نومها وهي مجردة من ملابسها، حيث علق: بالعقل لو صورتها أنا أتحبس أصلًا وفيه حد بيصور مراته ويبعت الصور لحد تاني يعني نخوتي حتى، كل الكلام ده كدب وأونطة.
سعد الصغير: جبت لـ شمس عربية وفيلا مجبتهاش لأم العيال
وكشف سعد الصغير تفاصيل مقابلته مع الراقصة شمس قبل رأس السنة، قائلا: اتقابلنا وقالتلي أنا عايزة فلوس وأنت عندك كتير فـ قلت لها إنتي أكتر واحدة أخدتي فلوس جبتلها فيلا وعربية مجبتهاش لأم العيال.
وسبق أن اتهمت الراقصة شمس الفنان سعد الصغير، بخطفها وتعديه عليها بالضرب ما أدى إلى إجهاض طفلتها، حسب ما أكدت خلال لقائها مع القاهرة 24، مشيرة إلى أنه يواصل تهديدها.
وتابعت الراقصة شمس: معرفش ليه سعد الصغير عمل معايا كده، كنت حامل في الشهر السابع و10 أيام، ومكنش فيه أي حاجة أو مشكلة، ومكنتش عايزة أخلّف منه، وقالي قبل كده متنزليش الطفل ده وبعد كده غير رأيه، بعدها بفترة جابلي بلطجية ودخل عليا البيت من 12 الضهر وفضل يكلم الدكاترة ويضربني، والدكتور قالي مش هينفع تعملي العملية لأن الجنين عمره 7 شهور، راح سعد قال للدكتور أنت هتعملها يعني هتعملها، والدكتور قالي هعملك العملية وأجهضني.
