عزت أبو عوف كان عارف بالمقلب قبل تصويره ووليد توفيق رفض عرض حلقته.. أبرز تصريحات هاني رمزي التليفزيونية
كشف الفنان هاني رمزي عن رأيه في منع في أغاني المهرجانات، كما تحدث عن كواليس برنامج المقالب الخاص به، كاشفًا اسم الفنان الوحيد الذي كان يعلم بالمقلب قبل تصويره، بالإضافة إلى الحديث في عدة موضوعات أخرى.
نستعرض لكم أبرز تصريحات هاني رمزي التليفزيونية
- مفيش فنان موجود حاليًا يقدر يحلّ مكان حسن حسني وهو سايب فراغ كبير جدًا وكان بيفنن في أي مكان ويسد في كل حتة.
- أنا مع عدم منع المهرجانات واللي مش عجبه ميتفرجش لأن ده فن وإبداع ومطربي المفضل هو عمر كمال.
- بيومي فؤاد مش بديل لحسن حسني ولكن هو له شخصيته وأسلوبه في الكوميديا وظلم له إنه يروح لمنطقة حسن حسني.
- نيللي كريم بتزن عليا نعمل غبي منه فيه جزء تاني ولما عملت الفيلم معايا كانت نجمة.
- مكنتش بقلد رامز جلال لما عملت برنامج المقالب عشان مش كل واحد عمل برنامج مقالب يبقى بيقلده.
- أنا مش من نوعية الفنانين اللي بيطلعوا على أنفسهم ألقاب وشايف الفنان أعلى من أي لقب.
- لو هنتج عمل هجيب حمدي الميرغني وتوته وعلي ربيع وأوس أوس عشان الناس محتاجة للكوميديا وحاجة ترفع الروح المعنوية في ظل الظروف الحالية.
- برنامج المقالب اللي قدمته نجح جدًا ومفيش حد من النجوم كان عارف بالمقلب.
- أنا وقعت فريسة لـ رامز جلال مرتين قبل كده وما كنتش أعرف إلا إني رايح أسجل برنامج عادي.
- فيه ناس بعد ما وقعوا في المقلب بتاعي رفضوا الحلقة تتعرض زي الفنان وليد توفيق وحلقته اتلغت بس مفيش مصري رفض.
- خلافاتي مع محمد فؤاد إشاعات لأنه عشرة عمري وجاري وواكلين مع بعض عيش وملح وكنا قريبين من بعض جدًا ومنقدرش نخون بعض أبدًا.
- كنت متفق مع الفنان عزت أبو عوف على المقلب وقلت له هجيبك لمقلب عندي لإني كنت خايف عليه جدًا لأنه كان خارج من مرض وبيمر بظروف صحية صعبة.
