بعد إثارتها الجدل بمنشور الـ زوجة الثانية.. البلوجر آية الغامري: عندي رسالة وهكملها مش طالعة أهزر
أثارت البلوجر آية الغامري حالة من الجدل على مواقع التواصل الاجتماعي، وذلك بعد البوست الذي نشرته على صفحتها الشخصية بفيس بوك، توضح فيه أن الزوجة الثانية لها مميزات، واستقبل المنشور موجة من التعليقات المعارضة والمؤيدة لها.
مقبلش أكون زوجة أولى
وقالت البلوجر آية الغامري في البوست الذي نشرته على صفحتها الشخصية على فيس بوك: مقبلش أكون زوجة أولى، لسبب بسيط، شوف مرحلة التأسيس دي مرحلة شديدة أوي، وبشوف كمان إن شخصية الراجل مابتبدأش تبان قبل سن 35، ولأن محدش ينفع يصبر للسن ده بدون زواج، فأنا شايفة بوزيشن الزوجة الثانية ده لذيذ جدًا، آهو تكوني انتي كمان أسستي نفسك وع الرايق كده، بلا تعب بلا كفاح بلا تكدير.
لتنهال عليها موجة من التعليقات وردود فعل المتابعين التي انقسمت إلى الكثير من المعارضين، وبعض المؤيدين، وينتشر البوست بسرعة كبيرة بين مستخدمي فيس بوك، ويثير الجدل على منصة التواصل الاجتماعي.
تعليق البلوجر على ردة الفعل
قالت البلوجر آية الغامري لـ القاهرة 24: أنا بحاول أنشر فكرة المينامليست، وهي عملية صعبة جدًا علشان كسر تابوهات التقاليد والمعتقدات مش سهل، وبدأت في ذلك في عام 2020، وكنت بكتب البوستات والبلوجز على السوشيال ميديا، ومن 4 شهور بدأت أعمل فيديوهات.
وأشارت إلى أنها أخصائي نفسي وأوضحت: أنا دارسة، وأنا مش طالعة أهزر أنا عندي رسالة وهكملها، وأنا بعمل على كسر المعتقدات، والتابوهات الخاطئة في العلاقات، التي لا تفيد وبنروح نتعالج منها، وإحنا ممكن نكسرها وننهيها عادي.
وتابعت: المينامليست، هو علم البساطة بيستخدم في كل المجالات، زي الهندسة المعمارية واللبس والديزاينز وهدفه التقليل والبساطة، وأنا بستخدمه في العلاقات، لأن العلاقات في مصر بقت معقدة جدًا والموضوع زاد عن حده فلازم نبسطه.
وعلقت عن بوست الزوجة الثانية الذي أثار الجدل قائلة: قبل ما أنشر البوست أنا كتبت قبلها جاهزين للتريند الجاي، وكان في أكتر من حاجة دفعتني إني أكتبه زي إن دايما بننظر للزوجة التانية إنها خطافة رجالة وديه فكره أنا مش حباها، ومصيبة سودا، وده فيه تعدي عليها، وعلى الدين والأخلاق والاحترام والأدب.
وأوضحت البلوجر آية الغامري: الراجل مش قاصر وبيفكر، وليه نقول عن الزوجة التانية كده، لما ممكن يكون الأوبشن الأول، إن الراجل هو اللي راح لها.
خرابة البيوت
وأوضحت: مجرد ما الراجل يتجوز التانية بيبقى الزوجتين متساويتين، والتعب اللي تعبته الزوجة الأول لا يخص الزوجة الثانية، وبمجرد عقد بينه وبين الثانية، الزوجة الأولى لا يحق لها أن تتكلم عن الزوجة الثاية بطريقة غير جيدة، أو تطلب من زوجها أن يطلقها.
وتابعت: الزوجة الأولى بتزعل علشان العمر والتعب اللي قدمته، ولها حق، بس انتي كنتي بتتعبي علشان مقابل ولا بتتعبي علشان بتحبي زوجك وبتحبي الحياة الأسرية وبتعمليها لله.
