عمر كمال يكشف موعد حفل زفافه.. وحمو بيكا: اتجوز قبل ما الفيران تاكل فلوسك وتدوّد
كشف مطرب المهرجانات عمر كمال موعد زفافه، خلال حضوره حفل زفاف حسن شاكوش أمس الجمعة، كما مازحه حمو بيكا وهو ينصحه باتخاذ هذه الخطوة.
وقال حمو بيكا لـ عمر كمال خلال لقائه مع القاهرة 24 في حفل زفاف حسن شاكوش: بقول لعمر كمال يفك الكيس شوية ويتجوز قبل ما الزلازل تيجي تاخدنا كلنا، فلوسه دوّدت تحت البلاط، خليك لحد ما الفران هتاكلها ومش هتستفاد بيها ولا هتتجوز، والعمر بيفوت لازم يتجوز.
ورد عمر كمال على حديث حمو بيكا قائلًا: أنا همشي بنصيحة حمو وإن شاء الله قريب هتجوز، عشان حسن شجعني النهارده جدًا، ووعد إن شاء الله هتجوز في العيد أو على الصيف، ونخلي أم حسن شاكوش تشوفلي عروسة زي ما شافتله.
واختتم عمر كمال حديثه، معربًا عن سعادته بزواج حسن شاكوش، وقال: أنا فرحان جدًا إن حسن بيتجوز لأن إحنا تعبنا جدًا وربنا كرمنا، وبفرح لما أشوف فرحتهم وده كان حلمنا إن ربنا يكرمنا في حياتنا، ونعمل حياة حلوة وعقبال كل الشباب.
حفل زفاف حسن شاكوش
على جانب آخر، احتفل مطرب المهرجانات حسن شاكوش بحفل زفافه أمس، على فتاة من خارج الوسط الفني تدعى ريم، وأحيا الحفل الفنان تامر حسني، رامي صبري، حمو بيكا، عمر كمال، وكان للفنان أحمد عصام بصمة خاصة بالألعاب النارية في الحفل.
من جانبه، تحدث حسن شاكوش عن زوجته ريم، كاشفًا كيف تعرّفا، خلال حواره مع القاهرة 24، وقال: النهارده آخر يوم في العزوبية، وريم بنت الجيران أصلًا، وهي مالهاش دعوة بالتيك توك ولا ممثلة ولا مغنية ولا ليها علاقة بالفن خالص، وأنا همنعها إنها تدخل الفن، وهمنعها من حاجات كتير وحشة هتقابلنا، لأن أنا راجل صعيدي ودخلت في مجال الفن وكل أصحابي الفنانين على المستوى الشخصي كل واحد بينقي شريكة حياته وأنا اخترتها ست بيت.
