رانيا يوسف: خالد يوسف مرفضش وجودي في سره الباتع وعمر ما كان في بينا خلافات
كشفت الفنانة رانيا يوسف، حقيقة رفض المخرج خالد يوسف تواجدها في مسلسله الجديد سره الباتع، والذي يشارك في الماراثون الرمضاني 2023.
وقالت رانيا يوسف، في تصريحات تلفزيونية: مسلسل سره الباتع متعرضش عليا أصلًا ولا أنا كنت مرشحة ولا المخرج خالد يوسف رفض وجودي، ولو كان اتعرض عليا دور حلو في العمل كنت هوافق، وعمر ما كان في خلاف بيني وبين خالد يوسف، إحنا أصدقاء وبنسأل على بعض وبنحترم بعض وبنته مايا بعتبرها بنتي التالتة.
رانيا يوسف: الأجر مش بيتحدد بالموهبة.. وبخاف من الفلوس والشهرة الزيادة
كما أكدت الفنانة رانيا يوسف، أن الأجر في الأعمال الفنية لا يتم تحديده على أساس الموهبة، موضحة: في ممثلات أقل مني موهبة وبياخدوا أجر أعلى مني، هي ماشية بالعكس وهما نجحوا على السوشيال ميديا لأن وراهم فلوس وعلاقات ونجحوا، والسوشيال ميديا بالنسبة ليا جديدة، والأجر بيتحدد على أساس السوشيال ميديا والعلاقات وعمره ما اتحدد على الموهبة، وطول عمري بخاف من الفلوس الزيادة والشهرة الزيادة، وبحب الفلوس اللي تسترني وتخليني مش محتاجة لحد.
رانيا يوسف: أنا متحملة مسؤولية بناتي كاملة ومفيش حد بيصرف عليهم غيري
وأضافت الفنانة رانيا يوسف، أنها من تتحمل مسؤولية ابنتيها كاملة قائلة: أقر وأعترف وأبصم بالعشرة أن أنا اللي متحملة مسؤولية بناتي كاملة ومفيش حد بيصرف عليهم غيري، ووالدهم هو اللي بعيد عنهم، وأنا تعبت من المسؤولية وساعات بقبل حاجات في شغلي علشان أوفي المسؤولية، وأنا بحب المسؤولية وأنا قدها.
