خالد يوسف: أنا مثير للجدل وهناك موقف أخلاقي ضدي.. وبضرب تعظيم سلام للي بيهاجموني
علق المخرج خالد يوسف، على الهجوم الذي تعرض له مسلسله الجديد سره الباتع، والذي يُعرض في الموسم الرمضاني الجاري، مؤكدًا أن هناك حملة ممنهجة عليه.
وقال خالد يوسف خلال حواره مع القاهرة 24: يوجد محاولة للتصيد ضدي عرفتها من أول لحظة، وأنا شخص مثير للجدل وعندي عداءات لا أنكرها، ومشروع سره الباتع بيشبه الإخوان بالاحتلال الفرنسي لأنهم الوحيدين اللي مشيوا بسرعة بعدما اقتربوا من الهوية الوطنية ولما يكون المسلسل بيقول كدا يبقى أكيد أنا عارف مين ضدي.
وواصل خالد يوسف: الهجوم على سره الباتع تربص، وأنا مش راجل بخبي دماغي في الرمل والناس دول تأثروا بحملة الاغتيال المعنوي عليا وعندهم موقف أخلاقي ضدي ولكن كل اللي بيهاجموني بضرب لهم تعظيم سلام وأنا مش هتغير، وأنا عارف بقدم إيه وراضي عن سره الباتع أكتر من أي عمل تاني عملته في حياتي.
خالد يوسف: سره الباتع أخد حقه وزيادة
وأضاف خالد يوسف: بشوف إن سره الباتع أخذ حقه وزيادة واتشاف كويس جدًا ومش بيفرق معايا الحملات اللي بتحصل، إنما بيفرق معايا رد الفعل الحقيقي للجمهور، لأن السوشيال ميديا مش مصر.
كما تطرق خالد يوسف للحديث عن سر تمسكه بـ رواية سره الباتع ومضمونها، وقال: الرواية من أول ما قريتها وأنا شاب وهي معلقة في دماغي لأنها بتحمل مضمون مهم في الشخصية المصرية وبتحمل معنى شديد الأهمية وهو أن تجمع إرادة المصريين تجعل أجسادهم يفرز إكسيرًا يصنع المعجزات.
وواصل خالد يوسف: حبيت أقدم الرواية في عمل فني عام 2009 قبل ثورة 25 يناير ولكن انشغلت بسبب انتخابات البرلمان وعندما عدت للإخراج فكرت في سره الباتع أول حاجة لأنها جزء من تكويني.
