البلوجر سارة محمد باكية في آخر ظهور لها: خطيبي بيهددني وبيقولي احترمي مرضك
ظهرت البلوجر سارة محمد، في فيديو جديد عبر حسابها الرسمي على موقع التواصل الاجتماعي فيس بوك، وأثارت جدلًا واسعًا بعد حديثها عن تعرضها للتهديد من قبل خطيبها السابق الذي تخلى عنها بعد إصابتها بالعمى.
فيديو البلوجر سارة
وقالت البلوجر سارة في الفيديو: كلكم عارفين اللي جرالي كلكم عارفين اللي حصلي والخرطوش اللي اخدته في دماغي والجبهة اللي اتفرتكت عندي والـ 70 غرزة، وعيني اللي اتصفت وعيني التانية اللي الأمل فيها ضعيف، والأمل الوحيد اللي عندي إن نفسيتي تتظبط عشان يبقى فيه أمل والأمل الضعيف اللي عندي ما ينتهيش.
وأضافت البلوجر سارة: يا جماعة أنا فديت حد بعيني يا جماعة، أنا فديت حد كان جنبي سواء خطيبي راجل غريب أي حد غريب، أنا فديت أي حد بعيني، أنا ما استاهلش إن الشخص ده يبقى مصدر لتدمير نفسيتي، الشخص ده اللي كان خطيبي بيهددني وبيقولي احترمي مرضك عشان خاطر لما الناس سألتني هو أنتي رجعتي لحياتك القديمة قولتلهم هرجع لحد اتخلى عني.
وأكملت: يا جماعة أقسم بالله أنا ما بقول غير الصراحة أنا شوفت تخليه عني قدام عيني اتخلى عني قدام عيني، يا أخي ده أنت لو راجل غريب وأنت ما عرفتش تحميني المفروض عينك تكون مكسورة ده أنا بنت جنبك وأنت ما قدرتش تحميني.
وأشارت سارة في الفيديو إلى أنها تعرضت للكثير من المواقف التي أحزنتها من قبل خطيبها، كما قال لها أنها تدعي المرض، بعد كل اللي حصلي ده بعد عيني اللي اتصفت، أنا كده مخسرتش حاجة، أنا مكنتش عايزة اتكلم، أنا مشوفتش أي موقف منه يدل على أنه متمسك بيا، في حاجات كتير مش عايزة أقولها، بعد ده كله يهددني وبيقولي احترمي مرضك.
وواصلت: أنت ماقدرتش تحميني وعرضتني للخطر، أنا كل ما أقول نفسيتي متظبطه يحاول يدمرلي نفسيتي، أنا مخسرتش حاجة كل اللي حصلي ده ومخسرتش حاجة، وفي الآخر يتقالي أنا جرالي إيه، أنا حقى هاخده يوم القيامة.
ويذكر أن البلوجر سارة تعرضت لحادث منذ فترة ليست بالقصيرة وهي بجانب خطيبها في السيارة، حيث أصيبت بخرطوش في رأسها، مما أسفر عن فقدانها البصر في إحدى عينيها، وتحاول الآن في علاج العين الأخرى التي أشار الأطباء إلى أن نسبة شفائها قليلة جدًا.
