قبل سن الـ 20 وبعدها
• الحياة عبارة عن دروس متتالية ملهاش نهاية، وكل درس بيضيف لرصيد الخبرات اللي بتشكل في النهاية قيمة الشخص نفسه.. كده كده الكل هيستقبل الدروس بس مش الكل هيبقى عنده القدرة على استيعابها أو إنه يستخلص منها العبرة أو إنه ينتبه ليها من الأساس.. عشان كده أنا مؤمن بنسبة 100% إن الناس بالنسبة للناس عبارة عن مدارس متحركة ماشية على رجلين، وإن ورا كل معرفة ليك بـ فلان، درس.. كمان هتكتشف مع الوقت إن كلنا بنتعلم من تجارب بعض لأنه مستحيل شخص واحد ياخد كل الدروس لوحده بتجاربه الشخصية.. لأ.. فيه دروس هتيجي لناس غيرك تعرفهم وهتسمع عنها منهم فهتتعلم منها، وفيه دروس هتقرا عنها حصلت لناس ماتعرفهمش فهتتعلم منها، وفيه دروس شخصية هتحصل ليك أنت فهتتعلم منها، وهكذا.
• الأستاذ محمد أحمد كتب على تويتر عن سؤال مهم قابله علي موقع من فترة كبيرة وبيقول: (إيه الحاجات اللى مفروض تكون في بالى أو أتعلمها في سن العشرينات؟).. إجابات السؤال العشوائي ده كانت فوق الـ 100 إجابة، وكل واحدة منهم كتبها شخص ما كانت بمثابة خلاصة تجربة الشخص ده في الدنيا أو درسه الأهم.. وطبعًا لأن مستحيل تكتب 100 إجابة حتى لو كل إجابة هتاخد سطر واحد قرر محمد يختار أفضل 20 نصيحة قدمها الناس لشخص تخطى سن الـ 20.. وكانت النصايح هي:
1 - الحياة بدأت بالفعل.. يعني من بعد العشرين وأنت طالع خلاص مفيش حاجة اسمها لما أكبر.. مفيش حاجة اسمها في المستقبل هعمل كذا.. أنت دلوقتي في المستقبل فلازم تبدأ تتعامل من المنطلق ده لأن الانتظار هيخليك متأخر كتير.
2 - الأصدقاء مش أون لاين بس!.. بمعنى إن الصديق اللي بجد هو اللي جمعتك بيه مواقف وأحداث.. اللي شاركك حاجات كتير في حياتك.. مش مجرد اتنين معزولين في Chat وقاعدين تتكلموا بدون فايدة أو قيمة حقيقية.. وقت الجد مش هتلاقي غير نفس الصديق اللي عمره ما كان اونلاين بس.
3 - لو قررت تحب استحمل كسرة القلب.. هي دي الضريبة.. يعني أنت حر بس لازم تعرف إن الطريق ممكن مايكونش سالك وسلس على طول الخط ولازم يكون في حساباتك مكان للإنكسار ده.. عشان كده خليك مستعد عشان ده في النهاية حدث وهيعدي لكن نتايجه طويلة المدى.
4 - المذاكرة مش بتنتهي بآخر امتحان في الكلية.. يعني لو عايز تكون شخص مميز لازم تكون دايمًا على علم ودراية بكل جديد في مجالك، وفي المكان اللي معرفتك هتقف عنده هتنتهي أنت.
5 - العائلة هي أهم هدف في حياتك.. حافظ عليها.
6 - كلنا عندنا نقط ضعف بس مينفعش تخلّي نقطة ضعفك تعطلك.. ركز على نقطة قوتك هي دي الأحق بإنك تطورها وتحسن منها.
7 - كل حاجة أنت شايفها تستاهل يبقى لازم تستحق مجهود.
8 - كل شيء هيكون سبب في إنك "تكبر" هييجي بعد ما تخرج من منطقة الـ Comfort zone.
9 - الحظ بييجي للمجتهد.. مفيش حظ بييجي لواحد قاعد مكانه.
10 - لو كان نسب وقت لزراعة شجرة من 20 سنة فخليك فاهم إن تاني أنسب وقت هو دلوقتي.. متأجلش حاجة للوقت الأنسب لإن مفيش حاجة اسمها الوقت الأنسب.. خد خطوة، والخطوة هتجيب خطوات.
11- متتعاملش مع الناس إنهم مضمونين في إيدك على طول!.. دايرتك القريبة تستحق إنك تعاملهم بتقدير وتحترم وجودهم وتحسسهم بكده.
12 - علاقاتك اللي اتكسرت وفشلت كل محاولاتك للاصلاح فيها لازم تغير نظرتك ليها إنها بقت درس تتعلم منه.. مينفعش تضيع عمرك في ترميم شيء مفيش منه أمل.
13 - مش هتقدر تعمل كل حاجة، ومش هتعرف تكون موجود في كل الأوقات.. عشان كده لازم تتعلم تعرف كويس إيه هي الحاجات اللي هتديها وقتك ومجهودك.
14 - على قد ما تقدر اتعلم من اللي حواليك.. ضيف لخبراتك.. اتعلم إزاي تتحكم في مشاعرك.. واصرف على تعليمك واستثمر في نفسك.. ده الاستثمار اللي مفيش معاه خسارة من أى نوع.
15 - كلمة بعدين ملعونة.. هتأخر يبقى مش هتعمل.. كل فرصة تبدو جيدة تيجي قدامك تستحق فرصتها من التخطيط والتفكير فيها ثم تستحق فرصتها من التنفيذ فورًا لو مفيهاش شيء يتعارض مع قناعاتك أو أخلاقك.
16 - الروتين قاتل.. أو الأنتخة بالمعنى الدارج.. لازم يكون ليك تدريب بشكل منتظم ولو حبة مشي كل يوم.. الاستثمار في جسمك استثمار مربح على أساس إن هو ده اللي هيشيلك بكره وبعده لما تكبر.
17- متخافش من الخسارة.. مفيش شخص مابيخسرش طول ما هو عايش لكن الأهم من الخسارة هو معرفة أسبابها مش الوقوف عندها.. تقبّل الخسارة جزء مهم من الحياة لكن اللي أهم منها التعّلم منها.
18 - ماتنتظرش حاجة من حد.. مش دايمًا هتلاقي مساعدة الناس في الوقت اللي أنت عايزه لإن كل واحد وله طاقة محدودة ونادر لما تلاقي حد يديلك كل مجهوده أو كل وقته.. ماتنتظرش إلا مساعدتك لنفسك، وبعدها لو جه مساعدة من غيرك يبقى تمام.. ماجاش مش هتبقى اعتمدت على سراب.
19 - مش الشغل الكتير هو اللي بيجيب فلوس لكن الشغل بذكاء.. معظم أغنياء العالم بيشتغلوا وقت أقل.. توجيه الشغل في الاتجاه الصح أهم بكتير من شغل كتير ومجهود كبير في اتجاه غلط.
20 - خليك جاهز عشان هتقابل الظلم كتير في حياتك.. بالمناسبة.. وجوده كتير مش معناه انتصاره عليك لكنه هيكون موجود.
• دروس الحياة مش بتخلص، ومفيش حد كبير على التعلم.. على قد ما هتعيش على قد ما هتشوف، وتتعلم، وتتلخبط، وتصلح، وتقع مرة وتقف ألف.. الفرق دايمًا فيك أنت.. هل هتكون مستعد لاستقبال دروس الحياة بالرضا والتعامل معاها بحكمة والتعلم منها ولا هتتكبر وتعند وتبقى الخسارة خسارتين.. فيه جملة عظيمة بتقول: (صدقني لو فقدت ما فقدت، لو كسر الحرمان أضلاعك، ستجتاز هذه الحياة كما يجتازها كل أحد فاختر الرضا يهُن عليك العبور).
