محمد محمود عبد العزيز يتحدث عن زوجته: بيننا أشياء كثيرة مشتركة.. واحتمالية تعارفنا كانت واحد في المليار
تحدث الفنان محمد محمود عبد العزيز عن زوجته وابنته تمارا، مشيرًا إلى أن زوجته جزائرية فرنسية، ولقائهما كان صدفة ولم يكن متوقعًا.
وقال محمد محمود عبد العزيز خلال ندوة تكريمه في القاهرة 24: مش مقصود أنها ما تكونش مصرية لكن في حاجات كتير مشتركة بينا منها علاقتنا بأهلنا وطريقة حياتنا واعتماد كل واحد على نفسه ومفيش حد منتظر حاجة من حد.
وأضاف محمد محمود عبد العزيز: كنت بتكلم معاها شخصيًا من قريب وقلت لها التركيبة دي جت إزاي مش فاهم لأن احتمالية إننا نتعرف على بعض كانت واحد في المليار، ووقتها سافرت فرنسا 4 أيام وهناك عرفتها ولما رجعت فضلت العلاقة موجودة وكنا بنتكلم، وبدأت العلاقة تكبر ويحصل ارتباط وجواز، وتخلل ده كورونا وماكناش عارفين نشوف بعض لكن ربك رايد حاجة بتحصل.
وتحدث محمد محمود عبد العزيز عن ابنته قائلا: تمارا الفقرة الكرتونية في حياتنا، ولسه بحاول اتعرف عليها لحد دلوقتي، وحساباتي اتغيرت وبدأت أتطرق لأفكار كتير ما كنتش بتيجي في دماغي وبحاول أعمل حاجات لنفسي وعيلتي وشايل عبء على دماغي، لأن وجود طفل أو طفلة مرتبط بيكي وباسمك وكيانك وتاريخك حمل كيبر، وعاوز أعملها كل حاجة حلوة مني عشان تبقى عارفة أن أبوها راجل محترم وبيحب بلده ومراته.
وعن الذي تعلمه من والده ويريد أن يعملها لابنته قال: في حاجات والدي ما قالهاش لكنه زرعها فينا بشكل غير مباشر وفي نصايح مباشرة زي أنه قال لي عاوز تمثل أهم حاجة في التمثيل أنك ما تمثلش، لكن في نصائح غير مباشرة زي موقف حصل اتصرف فيه إزاي أو حاجة ليها علاقة بخير أو حب بلدي، وعمره ما قال لي صلي بشكل مباشر لكن بيصلي قدامي.
